Татарстанда котырган мәчеләр кешеләргә ташлана: берничә районда карантин кертелергә мөмкин

18 районда һәм Казанда авыру очраклары ачыкланган. Хайваннарны вакцинацияләү һәм төлкеләр санын көйләү эшләре дәвам итә.

Татарстанда хайваннар арасында котыру авыруы очраклары һәм вирус таралу географиясе арта. Тукай районында, мәсәлән, котырган мәче кешеләргә ташланганнан соң карантин кертергә мәҗбүр булганнар. Республикадагы тагын биш районда да шундый ук чикләүләр кертелергә мөмкин.

Бу хакта «Татар-информ» агентлыгына Татарстан Республикасы Министрлар Кабинетының Баш ветеринария идарәсе башлыгы урынбасары Габделхак Мотыйгуллин хәбәр иткән.

Ел башыннан бирле 18 районда һәм Казанда котыру авыруы буенча 29 имин булмаган пункт теркәлгән. Алар — Алабуга, Яшел Үзән, Бөгелмә, Минзәлә, Мамадыш, Сарман, Нурлат, Тукай, Актаныш, Зәй, Лаеш, Алексеевск, Кукмара, Спас, Чирмешән, Чистай, Чүпрәле һәм Баулы районнары, шулай ук Казан шәһәре.

— Иң күп очраклар Актаныш һәм Минзәлә районнарында теркәлгән — өчәр. Узган ел исә иң күп очрак Алабуга районында булган, — дип белдергән Габделхак Мотыйгуллин.

Узган ел 14 муниципаль районда котыру авыруы буенча 21 имин булмаган пункт ачыкланган. Алабуга районында — өч, Әлмәт, Биектау, Зәй һәм Сарман районнарында икешәр, Әгерҗе, Балтач, Буа, Кама Тамагы, Мамадыш, Яңа Чишмә, Нурлат, Саба һәм Теләче районнарында берешәр очрак теркәлгән.

Куркыныч янәшә генә

Быелгы статистика аеруча борчулы. Узган ел эре мөгезле терлекләрдә котыру авыруының ике очрагы теркәлгән. Шулай ук сигез эттә, биш мәчедә, җиде төлкедә һәм ике бурсыкта әлеге чир ачыкланган.

2026 елда исә 12 мәче, сигез эт, биш төлке, шулай ук бурсык, сусар һәм сыерда котыру авыруы теркәлгән. Быел чир мәчеләр арасында ешрак очрый.

— Төлкеләр көндез дә кешеләр һәм йорт хайваннары янына килә. Алар һөҗүм иткән очракта, чир башка җан ияләренә дә йогарга мөмкин, — дип аңлаткан Габделхак Мотыйгуллин.

Котыру авыруын таратучыларның берсе — кыргый төлкеләр. Шуңа күрә аларның санын көйләү буенча эшләр күп еллар дәвамында алып барыла. 2023 елда — 5261, 2024 елда — 6624, 2025 елда 7509 төлке атылган.

Татарстан Республикасы Биоресурслар буенча дәүләт комитетының Хайваннар һәм үсемлекләр дөньясын саклау идарәсе башлыгы Ринат Чиспияков та төлкеләрнең вирус таратуда зур роль уйнавын һәм торак пунктларга еш килүен билгеләп үткән.

— Без Баш ветеринария идарәсе белән тыгыз элемтәдә эшлибез. Куркыныч кыргый хайваннар санын көйләү буенча чаралар үткәрәбез, — дигән ул.

Ринат Чиспияков котыру авыруының кыргый һәм йорт хайваннары өчен генә түгел, кеше өчен дә куркыныч булуын искәрткән. Вирус, гадәттә, авыру хайван тешләгәндә яки аның селәгәе җәрәхәтләнгән тирегә һәм лайлалы тышчаларга эләккәндә йога. Шуңа күрә хайван тешләгән очракта, яраны кичекмәстән сабынлы су белән яхшылап юарга һәм тиз арада медицина учреждениесенә мөрәҗәгать итәргә кирәк.