Халык синоптигы Рәис Шәкүров: «Көз иртәли, кыш салкын булмаячак»

Бәрәңге сабаклары кышның нинди булачагын күрсәтә

Бактың исә, ул моны бәрәңге сабакларына карап фаразлый икән. «Бәрәңге сабагы басып торса, кыш уртача була. Төньякка караса — салкын, ә көньякка караса җылы килә. Бу элекке сынамыш, туры килергә тиеш», — дип аңлата ул. Аның әйтүенчә, быел миләш уңышы мактанырлык түгел. «Миләш күп булган елны арыш уңа» дигән сынамышка ышансак, киләсе елга арыш уңышы әллә ни булмас кебек икән.

Каен яфраклары көзнең иртә килүен күрсәтә

Ә менә көзне иртәрәк килергә тиеш юрый. «3 сентябрьгә каен яфрагы 1 сантиметр тирәсе саргайган булса, көз соңара. Күзәтеп йөрдем, 20 августта ук ул саргайган иде. Көз иртәрәк киләчәк дип уйлыйм. Аннары быел яр карлыгачлары да бер ун көнгә иртә китте, бу да көзнең иртә килүен билгели. Ашарга бетәсен чамалап, китү ягын кайгырта башлый алар», — ди халык синоптигы.

Рәис абыйдан халык сынамышлары буенча һава торышы фаразлары

Әбиләр чуагын августта, сентябрьдә үк эзләргә кушмый. «Ул октябрьнең 20ләре тирәсендә була. Булса инде. Байтак еллар элек инде, бер елны 19-24 октябрьдә җылылык 25 градуска җиткән иде. Ул вакытта чишенеп койма корганым истә. Менә ул чынлап та әбиләр чуагы була», — ди Рәис абый.