Үзе Казан янында гына, ләкин нәкь шул проблема тудыра да инде

Алдан ук әйтергә кирәктер, монда район үзәге булып 5 мең кеше яши торган Биектау тимер юл станциясе бистәсе тора, ә Биектау авылы аерым җирлек санала. Анда исә 20 меңнән артык халык исәпләнә. Шулай да, мин аларны икесен бер итеп карарга уйладым, чөнки объектлар һәрберсендә бар һәм алар сибелеп урнашкан. Әлбәттә, бистәгә тимер юл аша чыгасы, бу әлеге район үзәгенең аерым бер билгесе булып тора. Үзем дә поезд узганын көтеп утырдым. Хәер, турыдан-туры М7 трассасына алып чыгучы юлы да бар. Монысы бик әйбәт, чөнки торак пункт һаман саен киңәя, барысының да “бөкедә” утырасы килми бит. 

Үзәккә барганда ук зур спорткомплекс һәм боз сарае күренде, янында гына Җиңү паркын ясап маташалар иде. Димәк, тиздән биектаулылар яңартылган җәмәгать урынлы булачак. Административ биналарның күбесе шушы бистәдә урнашкан. Сквер шикелле җирлектән зур мәйданга чыгасын. Анда район хакимияте, крайны өйрәнү музее, спорткомплекс, “Татмедиа” филиалы һәм башка күп кенә биналар күренде. Якындагы мәктәптә төзелеш эшләре бара иде, ремонты шәп булырга охшаган. Сквер эчендә Батырлар аллеясы да эшләнгән. Мәйданның икенче ягында матур мәчет каршы ала.

Әле шунысына игътибар бирдем, әйләнә-тирәне күпкатлы йортлар уратып алган, яңа төзелгәннәре дә җитәрлек. Бу нәрсә дигән сүз? Беренчедән, халык Биектауны яшәү өчен уңайлы җир дип санап, монда фатир сатып ала, икенчедән, девелоперлар әлеге җирлекне коммерцияле күчемсез милек белән эш итү өчен яхшы урын дип кабул итә. Моның шулай икәнен алга таба район үзәге буйлап йөргәндә дә аңладым, чөнки уңнан һәм сулдан зур йортлар калкып кына торды. 
Биектау тимер юл станциясе бистәсендә нәкъ менә элекегедән калган җирле халык яши. Урамнарыннан узганда шәхси өйләрнең күптәннән төзелгәнлегенә игътибар иттем. Хуҗалыкларын бик әйбәт карыйлар, яңа кишәрлекләрдән бер дә ким түгел. Ничә буын шушында яшәүче биектаулыларны күрәсегез килсә, монда алар бар.

Үзәк мәйданнан ерак түгел шифаханә һәм район хастаханәсе урнашкан. Күренеп тора, күптән түгел генә биналарда зур төзелеш эшләре башкарылган, медицина тармагы буенча халыкка хезмәт итү ярыйсы оештырылган. Берничә йөз метр киткәннән соң каршыда “Рябинушка” исемле балалар бакчасы калкып чыкты. Хәер, эчендә төзек һәм матур булса да, коймасын алмаштыру комачауламас иде. Шуның янында шәхси балалар бакчасы да бар.

Шунысын әйтеп куярга кирәктер, бистә һәм Биектау авылын үз эченә алган район үзәгендә алар бишәү, мәктәпләр саны да шундый ук. Җирле халык әйтүенчә, аларга чират зур, уку да ике сменага бүленгән, нормадан артык балага белем бирәләр, чөнки урыннар җитми. Монысы инде Казан янында урнашкан барлык муниципалитетка да кагыладыр, мөгаен, тик бу проблеманы хәл итеп блумый дигән сүз түгел, җитәкчелеккә эшләргә мәйдан җитәрлек. 

Тимер юл станциясе бистәсеннән Биектау авылына барганда юл янындагы утыргычлар ясап эшләнгән ял итү мәйданчыгын күреп алдым. Бик кызыклы җир бу, халыкка эшләп кайтканнан соң, чыгып хәл алу өчен менә дигән ул. Өстәвенә, юлның икенче ягындагысы автобус тукталышы буларак та хезмәт итә. Әлеге мәйданчык Биектау аша Арча, Әтнә яисә Балтачка таба барганда бар кеше күреп кала торган сәүдә һәм күңел ачу комплексыннан ерак түгел. Авылның үзендә исә, әйткәнемчә, 20 меңнән артык кеше яши. Ул күзгә күренеп үсә.

Монда коттеджлар да, күпфатирлы йортлар да төзелә, ай саен диярлек яңа урамнар барлыкка килә. Шуларны карый-карый, акрын гына “Казан арты” дигән зур паркка килеп җиттек. Бу Биектау авылының горурлыгы булып санала, чөнки халыкның күбесе шушында ял итәргә килә, монда балалар өчен дә мәйданчыклар бар, футбол уйнарга да була, хәтта район Сабантуе да әлеге җирлектә уздырыла. Янында гына бик матур “Тынычлык” мәчете балкып тора, аннан ерак түгел бассейн күренә. 

Монда йөргәндә, миңа бер фикер килде: ни дисәң дә, җәмгысе 25 меңнән артык халкы булган Биектау өчен өч җәмәгать урыны аз инде. “Казан арты” паркы, үзәктәге сквер һәм төзекләндерелүче Җиңү паркы – шуның белән бетте. Әле моңа өстәп, мәктәп һәм балалар бакчаларының җитмәвен әйтергә кирәк. Шул ук вакытта Казан янындагы районнарның язмышы шундый икәнен аңлыйм, чөнки төзелеш көчле бара, ә алар артыннан инфраструктура ясарга җитешмиләр. Хәер, хакимият шуңа кирәк тә бит инде ул, проблеманы хәл итәр өчен. Әнә, Биектауның 3нче мәктәбенә һәм “Бәләкәч” балалар бакчасына илтә торган юлы бомба төшкән кебек. Анысын да ясарга кирәк, чөнки күп кеше шуннан Казанга чыгып китә. Шулай да, җирләре матур, чөнки кая карама – урман, шуның белән алдыра әлеге район үзәге.