«Әссәламүгаләйкүм» дип сәламләшүнең әһәмияте

Шулай ук сәлам бирүче «Әссәламүгаләйкүм вә рахмәтуллаһи вә бәракәтүһү», ә сәлам алучы «Вәгаләйкүм әссәлам вә рахмәтуллаһи вә бәракәтүһү» дип тә сәламләшергә мөмкин. Сәлам биргәндә бер-берләренең кулларын кысарлар. Сәлам – сәламәтлек, тынычлык, исәнлек яисә бер нәрсәнең яхшы һәм хәерле булуын теләү дигәнне аңлата. Сәламләшү – иң яхшы гадәтләребезнең берсе.

Өйдә, урамда, мәктәптә, юлда – кайда гына булмасын, бер мөселман икенче мөселман кардәше белән очрашканда, аларның сәламләшүе күркәм гамәлләрдән санала. Пәйгамбәребез әйтте: “Арагыздагы җылылыкны арттырачак нәрсәне сезгә белдеримме? Арагызда сәлам таратыгыз”.

Сәлам бирү тәртибе: басып торган яисә барган кеше утырган кешегә беренче сәлам бирер; аз кеше күп кешегә беренче сәлам бирер; яшьрәкләр олыракларга беренче сәлам бирерләр, шулай ук олыраклар, яшьрәкләрне сәламгә күндерер өчен, аларга беренче булып сәлам бирерләр.

Динебез буенча түбәндәге хәлдә кешеләргә сәлам бирелмәс: намаз укып утырган кешегә, Коръән укыган кешегә, вәгазь сөйләгән имамга, аракы эчеп утыручыларга, бәдрәфтә булган кешегә. Бер кеше аркылы безгә җибәрелгән сәламгә дә “Вәгаләйкүм әссәлам” дип җавап бирү кирәк.

Кем дә булса берәр кешегә сәлам җибәрсә, ул сәламне иясенә тапшырыгыз, чөнки бу сәлам – бер әманәттер.

(“Ислам тәрбиясе” китабыннан)