Шәхси тормышыгызга күз салыгыз: 29 гыйнвар – 5 февральгә йолдызнамә

Кучкар (21 март – 20 апрель)
Сезгә бар эшегезне ташлап, ял итәргә кирәк. Биш минут ятып алырга түгел, ә чын-чынлап ял итәргә. Ялларыгызны шуңа багышлагыз. Гаиләгез белән берәр кая барып кайтыгыз, рухи ял кирәк сезгә.

Үгезбозау (21 апрель – 20 май)
Тышкы тормышны буран дип күзалласак, ул һәрчак котыра һәм туздыра. Иң мөһиме күңелдә яз булсын. Шуңа урамда салкын бураннар булса да, күңелдә җылылык калсын.

Игезәкләр (21 май – 21 июнь)
Үткән белән киләчәк арасында калырсыз. Бер яктан гадәти ияләшелгән йомшак салмак тормыш, икенче яктан үзенең көчле дәрте белән кайнап торган яңалык киләчәк. Әлбәттә, югалып калырга мөмкинсез. Ләкин гел бер урында да утырып булмый.

Кысла (22 июнь – 22 июль)
Әйтерсең лә, бер әйбер дә сез әйтмичә селкенми. Башта ачуыгыз килсә дә, үзегезне кулга алырга тырышыгыз. Тавыш өстенә тавыш кирәкми. Дәшми калу – алтынга тиң.

Арыслан (23 июль – 23 август) 
Ике урындыкта бик утырасыгыз килсә дә, барып чыкмас. Берсе булмаса, икенчесе, я икесе дә җимерелеп төшәр. Арысланнар, сайларга вакыт! Бу адымнан күп качып йөрдегез...

Кыз (24 август – 23 сентябрь)
Уңышка бик ышанмасагыз да, ул сезгә бик ышана. Үзегезне гел уңышсыз дип сөйләп йөрсәгез дә, тиздән моның алай түгеллеге исбатланачак. Иң мөһиме – моны “ялгыш туры килү” белән бутамагыз.

Үлчәү (24 сентябрь – 23 октябрь)
Шәхси тормышыгызга күз салыгыз. Дөнья хәлләре белән мавыгып, сөйгән ярыгыз турында онытып җибәргәнсез. Сезне яратучы, кадерләүче кешегә карата бу дөрес түгел. Үзгәрә башлагыз.

Чаян (24 октябрь – 22 ноябрь)
Инде күптән бер кешене уйлап йөрисез. Уйлап йөрү белән генә эш итеп булмый, беренче адым ясарга кирәк. Яхшылап уйлагыз, бу адым сезгә кирәкме? Йә үз теләкләрегезне белдерегез, йә бу уйдан кире кайтыгыз.

Укчы ( 23 ноябрь – 21 декабрь )
Сезгә соңгы арада бик күп төшләр керергә мөмкин. Арасында чынга аша торганнары да булыр. Алай да алдан ук куркып куймагыз, бары матурлары һәм шатлыклылары гына чынбарлыкка күчәр.

Кәҗәмөгез (22 декабрь – 20 гыйнвар)
Тиздән гаиләгезгә сезнең ярдәмегез кирәк булырга мөмкин, бар эшегезне ташлап аларга булышсагыз хәерлерәк. Чөнки барлыкка килгән кыенлыктан чыгу юлын бары сез генә беләсез.

Сукояр (21 гыйнвар – 18 февраль)
Тиздән көтелмәгән кунаклар кайтырга мөмкин. Мөмкин кадәр ачык йөз белән каршы алыгыз. Чөнки соңыннан берсе сезгә бик нык ярдәм итәчәк. Ямьле йөзле кешегә кем каршы килсен инде.

Балык (19 февраль – 20 март)
Халык юкка гына “таш атканга, аш ат” димәгән. Үз дәрәҗәгезне төшереп, “буш башларга” фикер аңлатып, вакыт әрәм итеп тормагыз. Беренче тапкырдан аңламыйлар икән, димәк әлегә алар моның өчен үсеп җитмәгән.

Фото: ru.freepik.com