Яшь хатын гаиләдәге авыр хәл турында: «Ирем өйгә кайтканда кәефем төшә»

Яшь хатын 5 яшьлек баласының да мондый мөнәсәбәтләрдән зыян күрүенә борчыла һәм гаиләдән китәргә җыенуын яза.

«Ирем эчкәндә дә, эчмәгәндә дә тыныч булмый»

«Мин дә шул ук кайгы, кызлар, ирем белән. Ул гел эчми, әмма эчсә, бөтенләй башка кешегә әйләнә кебек. Тыныч кына утыра да, кинәт кычкыра башлый. Аны туктатып булмый, үзен контрольдә тота алмый.

Эчмәгән вакытта да талаш чыкканда әйберләр вата. Кем булуына да карамый: балага да, хатынына да, чит кешегә дә игътибар итми. Кайбер вакытта кул күтәрергә кадәр барып җитәргә мөмкин.

«Нәрсә генә булса да, ахыр чиктә мин гаепле булып калам»

Аның белән тыныч кына сөйләшеп, проблеманы уртага салып хәл итү мөмкин түгел. Нәрсә генә әйтсәм дә, ахыр чиктә мин гаепле булып калам. Мин берәр нәрсә эшләсәм яки әйтсәм — начар була, ә ул шул ук сүзне әйтсә яки шул ук эшне эшләсә, моны һәрвакыт үзенчә аклый. Дөреслекне үз ягына бора. Аның турында хәзерге вакытта «нарцисс» дип әйтәләр. Мин дә бу теманы күп өйрәндем, хәтта берничә тапкыр китеп тә карадым. Әмма кабат кайттым.

«Ул өйдә булмаганда миңа рәхәт»

Минем өчен иң авыры — ул өйдә булмаганда миңа рәхәт. Ә ул кайтуга кәефем төшә. Үзем дә моңа игътибар итә башладым. Хәзер инде мин аннан окончательно китәсем килә. Әкренләп җыенам. Бәлки, минем урынымда булмаган кеше моны аңламас. Шуңа күрә мине гаепләмәвегезне, аеруча үз тормышыннан канәгать булмаган кешеләрнең хөкем итмәвен сорыйм.

«Интимга да мәҗбүр итә»

Иң авыр мәсьәләләрнең берсе — интим мөнәсәбәтләрдә дә минем теләгемне исәпкә алмый. Мин телимме, юкмы, миңа авыртамы — аның өчен барыбер кебек. «Син хатын-кыз гына, түзәргә тиеш», ди. Бу хәлдән инде яшәргә көчем калмады. Мин мондый хәл белән башка хатын-кызларның да очрашканын беләм. Шуңа күрә алардан киңәш сорыйм: мондый мөнәсәбәттән ничек куркынычсыз рәвештә чыгарга?

«Баламның психикасы өчен борчылам»

Минем 5 яшьлек балам бар. Ул барысын да күрә һәм ишетә. Әгәр дә өйдә кычкыру, әйбер вату, куркыту дәвам итсә, баланың психикасына зыян килер дип куркам. Шуңа күрә хәзер төп теләгем — үзем һәм балам өчен тыныч һәм куркынычсыз тормыш башлау. Мин дөрес эш итәмме? Мондый мөнәсәбәттән чыккан хатын-кызлар, зинһар, үз тәҗрибәгез белән уртаклашыгыз".