Тәрәзә төбендә сабый: бәлане булдырмас өчен нишләргә?

Куркынычсызлык академиясе җитәкчесе Ольга Бочкова балалар белән мондый бәла килеп чыкмасын өчен үзенең тәкъдимнәрен җиткергән.
Белгеч сүзләренчә, кечкенә балага куркынычсызлык кагыйдәләрен аңлатып була дип уйлау дөрес фикер түгел.Бигрәк тә мәктәпкәчә яшьтәге балаларга аңлатуның мәгънәсе юк. Шуңа да торак балалар өчен куркынычсыз булырга тиеш, ди белгеч.

Беренчедән, тәрәзәләр блокка куела торган яисә бикләнгән булырга тиеш. Икенчедән, баланы беркайчан да күз алдыннан югалтмагыз. Әгәр дә бала икенче бүлмәдә икән, ул әти-әнисе күрмәгәндә тәрәзә төбенә менәргә һәм тәрәзә аша дөньяны күзәтә башларга мөмкин. Шуңа да тәрәзәләрнең ябылган булуы һәм бала ача алмавы мөһим. Шулай ук урындыкларны тәрәзә тирәсендә калдырмагыз. Баланы тәрәзә төбенә утыртып, урамны карарга да киңш ителми. Чөнки бу балада кызыксыну уята.

Тәрзәләргә куела торган механизмнарга килсәк, алар хәзер бик күп төрле. Иң ышанычлысы — рәшәткәләр. Караклар кермәсен өчен куела торган рәшәткәләрнең хәзер тәрәзәнең ярты өлешен генә каплап куя торганнары бар. Алар тәрәзә ачык булганга гына кулланыла. Кирәкмәгәндә алып куярга да мөмкин. Мондый конструкцияләрне бары өлкәннәр яисә үсмерләр генә ала һәм урнаштыра ала.

Мондый системаны урнаштырыр алдыннан аның тиз алып куела торган булуына инаныгыз. Янгын була калса бу бик мөһим фактор. Шулай ук рәшәткәләр арасы 10 см дан ераграк булмасын. Зуррак тишеккә бала башын тыгуы бар, дип кисәтә белгечләр.
Балаларны тәрәзәдән егылудан саклауның тагын бер ысулы — ачылмалы тәрәзәләргә фиксатор кую. Бу бик гади ысул. Тәрәзәне ача торган гади тотка урынына йозаклыны куйдырырга.

Тагын “балалар” йозагы була. Алар тәрәзәнең аскы өлешендә урнаштырыла. Мондый тәрәзәләрне бала зур итеп ача алмаячак, чөнки җилләтү режимына гына куеп булачак.

Куркынычсызлык тросы да балаларны тәрәзәдән егылудан саклаячак, дип киңәш итә тәрәзә куючылар. Ул ачкыч ярдәмендә тәрәзәне блокка кую мөмкинлеге бирә. Кирәк вакытта тәрәзәне билгеле бер зурлыкта ачып була. Мондый трослар тәрәзәгә дә, ишеккә дә куялар. Ул 500 кг кадәр авырлыкны тота ала.
Бу ысулларның кайсына өстенлек бирсәгез дә, мөстәкыйль рәвештә урнаштырмагыз. Белгечләргә мөрәҗәгать итегез.
Әгәр дә андый җайланмалар урнаштырырга акчагыз юк икән, тәрәзә тоткычын борып алыгыз һәм аны балалар ала алмый торган урынга куегыз.

Фото: freepik.com