1 февральдән ана капиталының күләме артачак

"1 февральдән беренче балага сертификат суммасы 60 мең сумнан 690 мең сумга кадәр артачак (690 266,95 сум). Икенче сабый туганда-элек сертификат рәсмиләштерелгән гаилә өстәмә рәвештә 222 меңгә якын (221 895,1 сум) алачак. Әгәр дә гаилә беренче баласы туганда ярдәм алмаса, икенчесе туганда ук ул тулы сумманы – ягъни 912 мең сумны (912 162,09 сум) ала алачак. Бу агымдагы дәрәҗәдән 80 меңгә диярлек күбрәк. Шунысы мөһим, ана капиталы суммасы быел әти-әни булганнар өчен генә түгел, ә узган елларда сертификат алган гаиләләр өчен дә арта. Хәтта әти-әниләрнең акчаларының бер өлеше социаль фонд счетында калса да, ул шулай ук индексацияләнәчәк», - дип сөйләгән Россия Хезмәт һәм социаль яклау министры Антон Котяков Россия Федерациясе Президенты Владимир Путинның Хөкүмәт әгъзалары белән киңәшмәсе барышында.

Исегезгә төшерәбез, Президент йөкләмәсе буенча Ана капиталы күләме ел саен 1 февральдән узган елдагы инфляциянең факттагы дәрәҗәсеннән чыгып индексацияләнә.

2020 елның 1 гыйнварыннан Ана капиталы сертификатын бирү турындагы карар бер ай дәвамында түгел, ә гаризаны кабул итү датасыннан 15 көн дәвамында кабул ителә.

Ана (гаилә) капиталы программасы Россиядә 2007 елның 1 гыйнварыннан гамәлгә ашырыла һәм бүген «Гаилә» милли проектының бер өлеше булып тора. Ана капиталы акчаларын торак шартларын яхшыртуга, белем алу, инвалид балалар өчен товарлар һәм хезмәтләр өчен түләүгә, әни кешенең пенсия тупланмаларына яки, әгәр гаиләнең җан башына уртача кереме төбәктәге яшәү минимумының 2 күләменнән артмаса, өч яшькә кадәрге теләсә кайсы балага айлык түләү рәвешендә алырга мөмкин.