Анатолий Иванов: "Созвездие-Йолдызлык" фестиваленең әһәмиятен республиканың барлык район башлыклары билгеләп үтә"

«Ул уникаль, чөнки анда, яшәү урынына һәм гаиләсенең финанс хәленә карамастан, теләсә кайсы талантлы бала үз көчен сынап карый ала. Республиканың барлык район башлыклары проектның гаять зур мәдәни әһәмиятен билгеләп үтә һәм костюмнар тегүгә, башка чыгымнарга бик теләп акча бүлеп бирә. Чөнки без фестивальнең күпмилләтле мәдәният дәрәҗәсен күтәрүен, аның иң яхшы традицияләрен саклавын һәм ныгытуын аңлыйбыз", - дип үз фикере белән уртаклашты Анатолий Иванов.

Ул әйткәнчә, фестивальгә регионда да, аннан читтә дә тиңнәр юк. Аның сүзләренә караганда, проект туктап калмасын өчен аңа алга таба үсү мөмкинлеге бирергә кирәк.

«Фестиваль Татарстан кысаларына гына сыймый. Чөнки ул зона этаплары, суперфиналлар һәм гала-концертлар гына түгел. Ул үз эшчәнлеген ел дәвамында башкара, яшь талантларга шәһәр һәм республика мәйданчыкларында үз сәләтләрен күрсәтү мөмкинлеге бирә. Минем уйлавымча, фестиваль бөтен Идел буен колачларга тиеш, бөтен Россияне дә бәлки», - дип саный Анатолий Иванов.

Фестиваль Балалар иҗаты аша төрле халыкларның милли сәнгатен үстерү белән дә үзенчәлекле.

«Балалар бик теләп татар, рус, башкорт, удмурт, мари, керәшен, чуаш һ.б. җыр-биюләрен башкара. Шул ук вакытта аларның номерларына аерым образлар, матур костюмнар булдыралар. Бу факт быелгы Россиядә Халык сәнгате һәм халыкларның матди булмаган мәдәни мирас елында үзенчәлекле төсмер ала", - дип нәтиҗә ясады район башлыгы.

Исегезгә төшерәбез, быел проектының сайлап алу турлары Казанда, Әлмәттә, Яр Чаллыда, Түбән Камада, Әгерҗедә, Чистайда, Арчада, Лаешта, Иске Чүпрәле авылында узып өлгерде. Йомгаклау зона этабы бүген һәм иртәгә Яшел Үзәндә узачак.

9-13 апрельдә сайлап алу турлары финалистлары КФУның «УНИКС» мәдәни-спорт комплексы һәм «Созвездие-Йолдызлык» арт-резиденциясендә суперфиналда очрашачак. Гадәттәгечә ул 22 апрельдә «Пирамида» мәдәни-күңел ачу комплексында зур Гала-концерт белән тәмамлана.

Сайлап алу турлары кысаларында зоналарда түгәрәк өстәлләр уздырылды. Анда сайлап алу комиссиясе әгъзалары проектта катнашучыларның барлык номинацияләрендә дә педагоглар белән очрашты, шул исәптән «Вокал-соло», «ВокалҖ ансамбльләр», «Хореография», «Конферанс» номинацияләре. Остазлар үз тәҗрибәләре белән уртаклашты. Фестиваль хәрәкәте кысыларында мондый очрашулар – инде күптәнге матур гадәт. Моннан тыш, Россия сәнгать осталары балалар өчен традицион мастер-класслар да уздырды.

Фестиваль хәрәкәте ЮНЕСКО эшләре буенча Россия Федерациясе комиссиясе эгидасы астында һәм ТР Президенты Рөстәм Миңнеханов патронажы астында уза.