Бөек Ватан сугышы ветераннарына теләкләр һәм рәхмәт сүзләре яздырып була

Казанда "Җиңүгә 70 адым" акциясе старт алды. Акция көн саен Казан үзәгендә махсус баннер янында үткәрелә. Һәр теләге булган кеше махсус ролик төшерүдә катнаша ала, ә ул Җиңү көнендә республика телеканалларында һәм интернетта урнаштырылачак. Проект Җиңү көненә 70 көн кала старт алды. Акцияне оештыручы "Бердәм Россия яшь гвардиясе" көн саен 70 ел элек булган вакыйгалар турында сөйләргә планлаштыра. Һәр теләге булган кеше Бөек Ватан сугышы ветераннарына теләкләрен һәм рәхмәт сүзләрен яздыра, шулай ук Муса Җәлилнең "Ана бәйрәме" поэмасы юлларын укый ала. Төшерелгән материал роликка кертелә һәм Җиңү көнендә күрсәтелә. Оештыручылар әйтүенчә, роликны төшерү көннәрендә Георгиев тасмалары өләшәчәкләр.