Чаллыда торак йортта шартлау һәм янгын чыгу факты буенча җинаять эше кузгатылган

Бу хакта "Татар-информ" агентлыгы хәбәрчесенә Россия Гадәттән тыш хәлләр министрлыгының ТР буенча Баш идарәсе матбугат хезмәте җитәкчесе Андрей Родыгин хәбәр иткән.

"Җинаять эше Чаллы буенча күзәтчелек эшчәнлеге һәм профилактика эшләре бүлеге тарафыннан РФ ҖК 168 маддәсе ("Саксызлык аркасында милекне юкка чыгару яки зыян китерү") билгеләре буенча билгесез затка карата кузгатылган", - дип ачыклык кертте ул.

"Тикшерү эшләре бара, әлегә тоткарланучылар юк", - дип тә өстәде Андрей Родыгин.

Искәртеп үтик, кичә 12.24 сәгатьтә автошәһәрдә 53 нче комплекста торак йортларның берсендә янгын чыгу турында хәбәр килде. Янгында хатын-кыз һәм бала зыян күргән.

Шулай итеп, янгын 6 фатирга зыян салган. Йорттан 104 кеше эвакуацияләнгән. Югары катлардан көчле төтенләнгән зонадан алты кеше коткарылган. Йөри алмый торган инвалид кызны янгын сүндерүчеләр күтәреп алып чыккан, тагын җиде кеше янгын баскычы ярдәмендә коткарылган.

«Камазжилбыт» ҖЧҖ кунакханәсенә вакытлыча яшәү өчен 81 кеше, шул исәптә 25 бала урнаштырылган.