Каклаган каз белән казылыкка - Russia Halal Market ярминкәсенә!

Ярминкәдә йөздән артык үзебезнең  фермер хуҗалыклары һәм агрофирмалары үз  продукциясен  тәкъдим итәчәк. Бөтен ассортимент тулысынча Хәләл продукция стандартларына туры киләчәк.

“Russia Halal Market ярминкәсенә әзерләнү  кысаларында без Татарстан Республикасы мөселманнары Диния нәзарәте белән берлектә «Казан»  агросәнәгать паркында күчмә киңәшмәләр үткәрдек. Ярминкәдә ит, сөт продукциясе, сырлар, икмәк-күмәч, кондитер әйберләре һәм башка күп нәрсә  сатып алырга мөмкин булачак. Барыгызны да Russia Halal Market ярминкәсенә чакырабыз”, - дип,  белдерү ясады  Татарстан авыл хуҗалыгы һәм азык-төлек министры урынбасары Рөстәм Гайнуллов.

Ярминкәдә татар милли аш-суының фермер продукциясе, мәсәлән, каклаган каз, казылык,  ат итеннән бастурма, каймак (сөт өсте), талкыш кәләвә һәм чәк-чәк кебек татлы ризыклар да булачак, дип ассызыклады  ул.

Ярминкәне ачу тантанасында Татарстан Республикасы Рәисе Рөстәм Миңнеханов, Татарстан Республикасы авыл хуҗалыгы һәм азык-төлек министры Марат Җәббаров, Ислам руханилары вәкилләре, KazanForum кунаклары катнашачак. 

Russia Halal Expoның төп бурычы – Россиядә хәләл индустрияне  популярлаштыру, сәүдә, икътисадый, социаль-мәдәни элемтәләр урнаштыру, икътисадның хәләл сегменты куәтен күрсәтү, продукцияне потенциаль сатып алучыларга һәм сәүдә партнерларына тәкъдим итү мөмкинлеген бирү.

Хәләл юнәлеше Татарстанда актив үсештә. 2023 елның беренче кварталында гына да республикадан 3 млн долларлык  продукция Казахстан, Азәрбайҗан, Белоруссия, Үзбәкстан, Кытай, Вьетнам, Берләшкән гарәп әмирлекләре, Германия, Кыргызстан кебек илләргә экспортланган. Хәләл продукциянең төп экспортерлары: “Агросила” холдингы, “Кәүсәр”, “Вамин”, “Камамбер”, “Эссен продакшн”, “Акульчев”, “Эмиз” предприятиеләре  һәм башкалар. Шушы һәм башка җитештерүчеләрнең продукциясен Russian Halal Market ярминкәсендә  күрергә һәм сатып алырга мөмкин булачак.