Матчапури ашаганың бармы?

Галина Шәрәфетдинова, Казан шәһәренең рестораторлар һәм отельерлар ассоциациясе башкаручы директоры:

- Грузин кафелары челтәре генә түгел, калган бик күп рестораннар да әзерләнде ул вакыйгага. Алар нишләптер игътибардан читтә генә калды. Киләсе елга тагын да хәтәррәк әзерләнергә ниятлиләр. Махсус ризыкларыбыз да бар, әлегә әйтми торабыз, диделәр. Меню белән генә түгел, туклану урыннарының бизәлеше турында да кайгыртачаклар. Чемпионат символикасы, туплар, төрле илләрнең флаглары белән бизәмәкчеләр. Җанатарлар гына түгел, башкаларга да футбол рухын йоктырырга телибез.

Резеда Хөсәенова, «Тәмле булсын» рестораны директоры:

- Киләсе елга мин дә бер «мөгез чыгарырга» уйлап торам. Нинди ризык буласын да күзаллап куйдым. Аның белән кунакларны каршы алганда да күңелле булыр иде. Нинди ризык буласы сер булып калсын. Грузин кухнясына килгәндә, «Афәрин!» диясе генә кала, кызыклы идея уйлап тапканнар. Безгә дә туристлар еш килә. Алар бигрәк тә токмачлы ашны, гөбәдия, өчпочмакны яратып ашый. Туклыклы да, тәмле дә ризыкларыбызга сокланып туя алмыйлар.

Михаил Хачатурян, Әрмән милли-мәдәни автономиясе рәисе:

- Без дә бу эштән читтә калмаска уйлыйбыз. Әлегә нинди ризыкны сайлаячагыбызны әйтә алмыйм, әмма ул футбол тубы формасында булыр дип уйлыйм. Безнең бик тәмле пешерә торган шеф-поварыбыз бар, аңа һичшиксез әйтеп куячакмын, моны хәзердән үк уйлый башларга кирәк булыр инде. Кунакларны яхшылап сыйларга кирәк.

Сүз уңаеннан, Казанга килгән футбол җанатарлары көненә 10-12 мең сум акча тота. Гадәттә, туристлар арасында уртача чек 6-8 мең сум тирәсендә тирбәлүен истә тотканда, футбол яратучылар акчаны күбрәк сарыф итә икән. Монда ашау да, яшәү дә, күңел ачулар да керә. Туризм комитеты рәисе Сергей Иванов сүзләренчә, Казанга иң күбе Чили, Мексика, Германия һәм Португалия җанатарлары килә.