Нинди мәдрәсәгә барырга?

9нчы сыйныфны тәмамлаучыларны кайсы мәдрәсәләргә кабул итәләр?

Ришат Әхмәтҗанов, Апас.

Татарстан мөселманнары диния нәзарәтенең мәгариф һәм фән бүлеге җитәкчесе Айдар Карибуллин:

- 9нчы сыйныфтан соң Казанның «Мөхәммәдия», Ислам динен кабул итүгә 1000 ел исемендәге мәдрәсәгә һәм Казан ислам көллиятенә кабул итәләр. Районнарга килгәндә, Кукмара, Әлмәт, Буа, Мамадыш, Урыссу һәм Чаллыдагы «Ак мәчет» мәдрәсәсендә дә укырга була. Барлык уку йортларының да тулай торагы бар. Имтиханнар август аенда оештырыла, булачак шәкертләрдән гарәп хәрефләрен тану, яза һәм укый белү таләп ителә. Гадәттә, мәдрәсәгә килүчеләр мәчетләр каршындагы уку курсларында укыган була. Аларга ул авырлык тудырмый. «Мөхәммәдия» мәдрәсәсенә быел конкурс булды, бер кеше урынына өчәр кеше дәгъва итте. Ислам динен кабул итүгә 1000 ел исемендәге мәдрәсәгә, Казан ислам көллиятенә, Буа, Чаллы мәдрәсәләренә фәкать ир-егетләр генә кабул ителә.