Суднодагы янгында һәлак булучылар бар

Отар бистәсе тирәсендә причалга килеп туктаган йөзгеч кран шартлау хакында хәбәр иткән идек. Төзекләндерү эшләре вакытында май цистернасына очкын эләгеп зур янгын чыкты. Беренчел мәгълүматлар буенча, зыян күрүчеләр юк, дип хәбәр ителсә дә, соңрак суднода бер кешенең һәлак булуы, берсенең авыр тән җәрәхәтләре алуы билгеле булды. Идел буе транспорт прокуратурасы матбугат хезмәте хәбәр итүенчә, Татарстан транспорт прокуратурасы әлеге ике кешене корбан иткән йөзгеч кранында янгын чыгу буенча тикшерү эше башлаган. Нигездә, ремонт эшләре үткәргән вакытта куркынычсызлык техникасы турындагы законнар үтәлеше тикшерелә.