Теракт вакытында Төркиядә калган Татарстан кызлары Казанга кайтты

Истамбул-Казан рейсы буенча очучы самолет бүген сәгать 1дә төшеп утырды. Аларны Татарстан Президенты вәкилләре, Татарстан башлыгы ярдәмчесе Ләйлә Фазлыева каршылады.

Кызлар кайтуга кунакханәләргә урнаштырылды, ә бүген ял иткәннән соң, алар махсус автобус белән Чаллыга кайтачак.

Биюче кызлар белән психологлар аралашкан, аларга психологик ярдәм кирәк булмаган.Ә менә педагоглары исән-сау кайтып җиткәннән соң, күз яшьләрен тыя алмаган.

Исегезгә төшерәбез: Болгариядән җиңү яулап кайтучы Татарстаннан 15 кыз һәм педагоглары Истанбул аша кайтканда, Төркия аэропортында теракт булу сәбәпле туган якларына тиешле вакытта кайта алмаган иде.