Мәскәүгә 7 айда 383,1 миллиард сум күчердек, үзебезгә калдымы?

Шуның 225,0 миллиард сумы республика бюджетына, ә 37,5 миллиард сумы җирле бюджетларга күчерелгән.

Татарстанның финанс министры урынбасары Алла Анфилова әлеге саннарны “Татар-информ” мәгълүмат агентлыгында үткәрелгән матбугат конференциясендә әйтте. Табышка салым иң саллысы, республика бюджеты аннан 103,1 миллиард сумга калынайган.

Физик затларның кеременә салым да республиканың берләштерелгән бюджетын шактый тулыландыра. Бу төр салымнан республика бюджетына 47,2 миллиард сум, ә җирле бюджетларга 21,8 миллиард сум кергән. Оешмаларның милек салымыннан 29,4 миллиард сум, җир салымыннан 4,9 миллиард сум җыелган.

— Татарстанда кайсы районнарның бюджеты иң ярлысы?- дип, “Шәһри Казан” газетасы исеменнән сорау бирдем.

Бермәл уйланып торганнан соң, Алла Анфилова:”Теге яки бу районны ярлы бюджетлы, дип атап булмый. Районнар бюджетлары республика бюджетыннан тигезләнелә”,-дип җавап кайтарды.

Татарстанның финанс министрының тагын бер урынбасары Гела Герасимова чыгышларны дәвам итеп әйткәнчә, 7 айда республиканың берләштерелгән бюджеты (төбәк һәм федераль чыганаклардан тупланган бюджет) чыгымнары 257,5 миллиард сум булган. Республика бюджетыннан 217,7 миллиард сум, җирле бюджетлардан 85 миллиард сум тотылган.

— Авыл җирлеген үстерүгә быел федераль бюджеттан 3,2 миллиард сум бирелде. Юллар төзелеше, демография, мәгариф, сәламәтлек саклау, экология илкүләм проектлары кысаларында да республикага федераль бюджеттан акчалар җибәрелә,- диде Гела Герасимова.