Славян халкы ничек бәйрәм итә? Яшел Үзән районында узачак “Иван Купала” бәйрәме моның ачык мисалы булачак

Мәдәният министрының беренче урынбасары Юлия Әдһәмова белдергәнчә, әлеге бәйрәмдә славян халкы су, ут, үләннәргә мөрәҗәгать итә. “Татар информ” агентлыгында узган матбугат чарасында  славян халкының милли бәйрәме турында сөйләделәр.

“Татарстан Республикасында украин халкының милли-мәдәни автономиясе” иҗтимагый оешмасы рәисе Татьяна Кутепова белдергәнчә, бүгенгесе көндә Татарстанда 10 меңләп украин кешесе яши. “Халкыбызның милли бәйрәмен халыкка күрсәтергә ярдәм иткәннәре өчен Татарстан хөкүмәтенә һәм мәдәният министрлыгына бик зур рәхмәт. Узган атнгада бу бәйрәм Чаллы шәһәрендә уздырылды, ә Яшел Үзәндә республика күләмендә бәйрәм ителәчәк”, – диде ул.
Килгән кунаклар өчен һөнәрчеләр ярминкәсе шәһәрчеге, халык һөнәрләре һәм себерке бәйләү буенча иҗади мастер-класслар, тематик фотозоналар һәм саламнан эшләнгән арт-объектлар һәм башка мөмкинлекләр булачак. Төп мәйданда  әйлән-бәйлән, баһадир уеннары һәм славян халкының уеннары узачак. Мәйдан 15:00 сәгатьтә башланып,
кичке 10га кадәр дәвам итәчәк. Бәйрәмнең төп өлеше зур концерт программасыннан торачак.  Кичке дүрттә кече сәхнәдә Яромир һәм Мәрьям башкаруында театральләштерелгән пролог белән башланып китә. Биштә исә төп сәхнәдә
Татарстан фольклор коллективларының чыгышы дәвам итәчәк. Кичке программада исә Санкт-Петербургтан,
Белоруссиядән, Сербиядән килгән иҗат коллективлары да катнашачак.  

– Иван купаланың төп символы – учак һәм су. Моны истә тотып бәйрәм ахырына без утлы шоу әзерләдек. Барыгызны да бәйрәмгә көтеп калабыз, – диде Яшел Үзән районының башкарма комитет җитәкчесенең социаль мәсьәләләр буенча урынбасары Динар Нигъмәтуллин.