Татарстанга салкыннар кайчан килә?

Хәзерге һава торышы октябрьнең соңгы чорына охшаш. Шунысы игътибарга лаек, ноябрьдә хәтта кыраулар да булмаган.

КФУ профессоры, география фәннәре докторы Юрий Переведенцев хәбәр иткәнчә, атна ахырында җепшек кар явуы көтелә. Якын көннәрдә температура +4тән +5 градуска кадәр булачак. Алдан фаразлау буенча, пәнҗешәмбедән +1 градус җылы көтелә, ә якшәмбе көнне температура -5 градуска кадәр төшәчәк.

Районнардагы агрономнар арасында, кар яумыйча, көннәр кинәт суытып җибәрмәсен тагын, дигән курку да бар. Чөнки шулай булган очракта, үсемлекләр өстендә боз элпәсе барлыкка килеп, алар тончыгырга мөмкин.