2026 елның иң көчле магнит давылларының берсе Җиргә килеп җитте

Россия Фәннәр академиясенең Кояш астрономиясе лабораториясе галимнәре мәгълүматларына караганда, ул Кояшта соңгы көннәрдә күзәтелгән плазма чыгарылулары нәтиҗәсендә барлыкка килгән.

Белгечләр аңлатуынча, биш баллы шкала буенча G3 дәрәҗәсе «көчле» категориясенә карый. Чагыштыру өчен, G1 дәрәҗәсе — зәгыйфь, ә G5 — экстремаль көчле магнит давылы булып санала.

Галимнәр фаразлавынча, бу юлы геомагнитик үзгәрешләр озакка сузылырга мөмкин. Моның сәбәбе — Кояштан соңрак чыккан плазма агымнарының элек чыгарылган матдә белән кушылып, зуррак һәм тотрыклы структура формалаштыруы.

Экспертлар бәяләвенчә, әлеге магнит давылы 2026 елда күзәтелгән иң көчле геомагнитик вакыйгаларның берсе булырга мөмкин. Ул көченә карап елның икенче яки өченче иң көчле давылы исемлегенә керә ала.

Магнит давыллары вакытында кайбер кешеләрдә баш авыртуы, кан басымы үзгәрүе, хәлсезлек һәм йокы бозылу кебек күренешләр күзәтелергә мөмкин. Моннан тыш, көчле геомагнитик активлык элемтә һәм навигация системалары эшенә дә йогынты ясарга мөмкин.