Алабугада БПЛА һөҗүменнән соң хастаханәләрдә өч зыян күрүче кала бирә

Бу хакта ТР Сәламәтлек саклау министрлыгы матбугат хезмәте хәбәр итә.

"Бүгенге көндә Чаллы хастаханәләреннән Алабуга районында БПЛА һөҗүме вакытында зыян күргән дүрт пациент өйләренә озатылды. Бер пациент Кама балалар медицина үзәгендә дәвалануын дәвам итә. Алабуга үзәк район хастаханәсендә дәваланган бер пациент чыгарылырга әзерләнә, икенчесе дәвалануын дәвам итә",-диелә министрлыкның матбугат хезмәте хәбәрендә. Барысына да кирәкле медицина ярдәме күрсәтелә.

15 июнь көнне Украина пилотсыз очкычларының Татарстан территориясенә чираттагы һөҗүме ясалды. БПЛА җимерекләре Алабуга районында автомобиль заводының контроль-кертү пункты бинасына төшкән иде. Бу хакта Татарстан Рәисе Рөстәм Миңнеханов Телеграм-каналында хәбәр итте.

Бер эшче һәлак булган. Барлыгы 13 кеше зыян күргән, бер кеше – авыр хәлдә. Барысына да медицина ярдәме күрсәтелгән. Урында янгын чыккан, аны оператив рәвештә сүндергәннәр.

«Гражданнарга һөҗүм безнең ил көрәшә торган канлы һәм рәхимсез Киев режимын тагын бер кат исбатлый. Һәлак булучының гаиләсенә тирән кайгы уртаклашу белдерәм. Зыян күрүчеләргә тизрәк савыгуларын телим. Куркуга салырга тырышуга карамастан, республикада барлык предприятиеләр һәм тормыш өчен кирәкле объектлары тотрыклы эшли. Оператив хезмәтләр даими хәрби әзерлектә», - дип хәбәр итте Миңнеханов.