Әлифба заманча эшли башлады

“Әлифба 2.0” мобиль кушымтасы эшли башлады. Бу хакта “Татар-информ” агентлыгында узган матбугат очрашуында билгеле булды. Аны ирле-хатынлы  Сәләй Вагыйзов һәм Рәмзия апа Вәлитова төзегән зәңгәр тышлы Әлифбага нигезләнеп эшләгәннәр. 1965 елда нәшер ителгән әлеге басма, берничә тапкыр бастырылып, бик күп буынны татарча  укырга, язарга өйрәтте. Хәзер ул методик белешмә буларак, заман балаларына мобиль кушымтада өйрәтелә.  

– Әлеге кушымтаны эшләр алдыннан без дистәләгән мобиль кушымталарны өйрәндек, – ди “Татар балалар нәшрияте” башкарма директоры Алсу Низамеева. – Татар телендә эшләнгән мобиль кушымталар бик сирәк. Бу эшкә алынуыбыз да юкка түгел. Чөнки заманнан артта калырга ярамый, бергә атларга кирәк. Әлифбадагы татар кызы Алсу мобиль кушымтага аяк басты. Минемчә, балаларны татарча укырга, язарга өйрәтү бик мавыктыргыч килеп чыкты.

Балалар хәрефләрне татар халык әкиятләре геройлары ярдәмендә өйрәнәчәк. Хәрефләрнең һәрберсенең үз персонажы бар, дәресләр уен формасында алып барыла.

– Бала үзе дә сизмәстән белем дөньясына кереп китә, – ди “Татармультфильм” студиясе директоры Азат Ганиев. – Бала уен уйнап татар телендә укырга, сөйләшергә, җөмләләр төзергә өйрәнә. Бер хәрефне өйрәнмичә икенчесенә күчеп булмый. Хәрефләрне өйрәнгән саен яңа уеннар өстәлә бара, балага яңа белемнәр тупларга ярдәм итә.

ТР мәгариф үсеше институтының татар теле һәм әдәбияте кафедрасы мөдире Рәсимә Шәмсетдинова белдергәнчә, заманча Әлифба проектын эшләүчеләргә киләчәктә каллиграфия юнәлешенә дә өстенлек бирергә кирәк. “Әлифба ул туган телдә укырга гына өйрәтеп калмыйча, матур итеп язарга да өйрәтергә тиеш, – ди Рәсимә Шәмсетдинова. – Заманча кушымта мәктәп Әлифбасын берничек тә алмаштыра алмый, мәктәптә китапның үз функциясе бар. Бу баланы белемгә тартуның бер алымы булып тора. Соңгы елларда матур язуга игътибар кимеде. Баланы дөрес, матур итеп язарга өйрәтү аның аң үсеше өчен кирәкле. “Әлифба 2.0”ның дәвамы булып, матур язарга өйрәтүне дә дәвам итәргә кирәк”.     

Әлеге заманча проект Татарстан Республикасы Рәисе Рөстәм Миннеханов һәм Марат Әхмәтов җитәкчелегендәге Татарстан Рәисе каршында татар телен саклау һәм үстерү комиссиясе ярдәме һәм телләрне кече яшьтән балаларга өйрәтүче “Бала-сити” балалар бакчасы методистлары белән тормышка ашырылган.
Мобиль кушымтаны телефоннарга бушлай урнаштырырга була.