Авыл халкы даруларны ничек ала? Татарстанда бу мәсьәлә буенча фикер алыштылар

Депутатлар, министрлык вәкилләре, табиблар һәм фармацевтлар авыл кешесе өчен даруларның никадәр кулжетемле булуы турында сөйләште.

Утырыш алдыннан комитет әгъзалары Арышхаздагы фельдшер-акушерлык пунктында, Шәле табиб амбулаториясендә һәм район даруханәсендә булып, эш барышы белән танышты.

Питрәч үзәк район хастаханәсе баш табибы Марат Вәлиев әйтүенчә, бүген районда даруларны 25 ФАПта һәм 6 табиб амбулаториясендә сатып алып була. Моннан тыш, медикаментларны өйләргә курьерлар аша китерү буенча 39 килешү төзелгән.

Районда 4,5 мең федераль һәм 5 меңнән артык төбәк дәрәҗәсендәге ташламалы дарулар алучы исәпләнә. Ел башыннан июньгә кадәр генә дә 78 миллион сумлык 30 мең ташламалы рецепт буенча дарулар бирелгән.

Социаль сәясәт комитеты рәисе Алексей Созинов сүзләренә караганда, авыл халкын дарулар белән тәэмин итү мәсьәләсе депутатларның даими игътибар үзәгендә кала.

– Авыл җирендә кешеләр өлкәнрәк, торак пунктлар арасында ара ерак, транспорт мәсьәләсе дә бар. Шуңа күрә даруларның һәркем өчен мөмкин кадәр кулжетемле булуы аеруча мөһим, – диде ул.

Аның фикеренчә, авыл медицинасын кадрлар белән тәэмин итү дә төп бурычларның берсе булып кала. Моның өчен фельдшерларны, шәфкать туташларын, фармацевтларны авылга җәлеп итү буенча федераль һәм республика программалары гамәлгә ашырыла.

Татарстан сәламәтлек саклау министры урынбасары Фәридә Яркәева хәбәр иткәнчә, бүген республикада ташламалы дарулар белән тәэмин итүдә 267 медицина учреждениесе катнаша. Ташламалы рецептларны 5,4 мең табиб һәм 1,6 мең фельдшер яза, ә алар буенча дарулар 145 даруханәдә бирелә.

Аның сүзләренчә, республика халкының дүрттән бере авылларда яши. Шуңа күрә дарулар белән тәэмин итүнең төрле механизмнары кулланыла: лицензияле ФАПлар һәм табиб амбулаторияләре аша сату, шулай ук даруларны курьер хезмәте белән өйләргә кадәр китерү.

Күчмә утырыш ахырында Социаль сәясәт комитетының 2026 елның беренче яртыеллыктагы эшенә дә йомгак ясалды. Бу чорда комитет 8 утырыш үткәргән, шул исәптән икесе – күчмә форматта. Депутатлар 18 мәсьәлә караган һәм Татарстан законнарына кагылышлы 7 проект буенча фикер алышкан. Бу хакта Татарстан Дәүләт Советы матбугат хезмәте хәбәр итте.