Биләрдә XV Халыкара «Сәләт» форумының өченче сменасы башланды

Ул 15–21 июль көннәрендә уза. Смена эшендә Татарстанның барлык районнарыннан һәм Россиянең төрле төбәкләреннән якынча 800 мәктәп укучысы катнаша.

Форумны «Сәләт» яшьләр үзәге җитәкчесе Айгөл Габдрахманова һәм проектларның фәнни җитәкчесе Әдип Әлмир ачып җибәрде. Чарада шулай ук Татарстан Дәүләт Советының Бюджет, салымнар һәм финанс комитеты рәисе урынбасары Камил Ногаев, Татарстан яшьләр эшләре министры Азат Кадыйров һәм Алексеевск районы вәкилләре катнашты.

Азат Кадыйров форумның яшьләр өчен мөһим белем һәм аралашу мәйданчыгы булуын билгеләп үтте. Камил Ногаев исә Дәүләт Советы җитәкчелеге исеменнән сәламләү сүзләрен җиткереп, «Сәләт»нең телне, мәдәниятне, тарихны һәм мәгърифәтне үстерүгә керткән өлешен ассызыклады. Ул шулай ук җәмгыятьтә бердәмлекнең әһәмиятенә тукталды.

Быелгы смена алты төп юнәлешне колачлый: иҗат, медиа, мәгълүмати технологияләр, «Биләр. Тамырлар», экология һәм лидерлык. Алар кысаларында махсус лабораторияләр эшләячәк.

«Иҗат» юнәлешендә бию, театр һәм музыка буенча иҗади проектлар әзерләнәчәк. «Медиа» лабораторияләрендә катнашучылар видеоконтент җитештерү һәм нейрочелтәрләр ярдәмендә аудио-визуаль материаллар булдыру белән шөгыльләнәчәк.

Мәгълүмати технологияләр юнәлешендә программалаштыру һәм робототехника буенча проектлар эшләү күздә тотыла. Ә «Биләр. Тамырлар» программасы археология, тарих һәм энциклопедик мәкаләләр әзерләүгә багышланган. Археология лабораториясендә укучылар Биләр шәһәрлегендә казу эшләрендә катнашачак.

Экология юнәлеше пластик һәм тукыма материалларын кабат эшкәртүгә, ә лидерлык юнәлеше командада эшләү һәм идарә күнекмәләрен үстерүгә юнәлтелгән.

Форум программасына шулай ук остаханәләр, ачык очрашулар, интерактив дәресләр, спорт һәм мәдәни чаралар кертелгән. Форум барышын онлайн күзәтергә теләүчеләр өчен «Җанлы Сәләт» туры эфирлары алып барылачак.

XV Халыкара «Сәләт» яшьләр уку-укыту форумы Татарстан Хөкүмәте һәм Татарстан Яшьләр эшләре министрлыгы ярдәме белән үткәрелә.