Бюджет хезмәткәрләренә «13нче хезмәт хакы» түләргә тәкъдим иттеләр

Әмма әлегә «13нче хезмәт хакы» турында сүз бары тик закон проекты кысаларында бара. 24 августта Дәүләт Думасына дәүләт һәм муниципаль учреждениеләр хезмәткәрләренә ел саен өстәмә түләү бирүне күздә тоткан закон проекты кертелде. Инициатива авторлары — «Справедливая Россия» депутатлары.

Проект кабул ителгән очракта, бюджет өлкәсендә эшләүчеләргә ел саен өстәмә түләү бирү мәҗбүри гарантиягә әйләнергә мөмкин.

Күпме түләргә тәкъдим итәләр?

Закон проекты буенча өстәмә түләүнең күләме билгеләнгән суммада яки хезмәт хакына карата процент белән билгеләнә ала. Әмма бер мөһим шарт бар: түләү узган елдагы уртача айлык хезмәт хакыннан ким булмаска тиеш.

Ягъни проект гамәлгә керсә, шартлы рәвештә, хезмәткәрнең узган елдагы уртача айлык кереме 50 мең сум тәшкил иткән булса, еллык өстәмә түләү 50 мең сумнан ким булмаска тиеш дигән принцип тәкъдим ителә. Инициатива Россия Хезмәт кодексының 144нче маддәсенә үзгәрешләр кертүне күздә тота.

Кемнәргә кагылырга мөмкин?

Тәкъдим дәүләт һәм муниципаль учреждениеләрдә эшләүчеләргә юнәлтелгән. Алар арасында мәгариф, сәламәтлек саклау, мәдәният, фән, социаль өлкә һәм спорт учреждениеләре хезмәткәрләре дә бар.

Авторлар фикеренчә, бюджет өлкәсендә хезмәт хакының бер өлеше төрле стимуллаштыручы һәм премия түләүләренә бәйле. Шуңа күрә еллык өстәмә түләүне закон белән гарантияләү хезмәткәрләрнең керемнәрен тотрыклырак итәргә мөмкин.

 Әлегә «13нче хезмәт хакы» юк

Иң мөһиме — бу инде кабул ителгән закон түгел. Закон проекты әле Дәүләт Думасында каралырга тиеш. Шуңа күрә хәзерге вакытта бюджет хезмәткәрләренә автомат рәвештә «13нче хезмәт хакы» түләнә башламый. Мондый премияләр бүген дә кайбер оешмаларда бирелергә мөмкин, әмма аларның түләнүе эш бирүченең гамәлдәге хезмәт хакы һәм премияләү системасына бәйле.

Әгәр закон проекты хупланса, өстәмә түләү мәҗбүри гарантиягә әйләнергә мөмкин. Моның өчен проект Дәүләт Думасында кабул ителергә, Федерация Советы тарафыннан хупланырга һәм Президент тарафыннан имзаланырга тиеш.