Дрон тоткан ир-ат белән куркытканнар

Казанда 16 яшьлек егет мошенникларның куркытуына ышанып, өйдә сакланган миллион сум акчаны тапшырган. Җинаятьчеләр яшүсмерне террорчыларга ярдәм итүдә гаепләп куркыткан.

Бу хакта «Татар-информ» матбугат конференциясендә аеруча мөһим эшләр буенча оперуполномоченный Рәдис Йосыпов сөйләде.

Барысы да социаль челтәрдәге танышу төркеменнән башланган. Егеткә бер кыз язган, аларның башка шәһәрдән кунакка килүләрен әйткән һәм Казанда кайда йөрергә мөмкин булуын сораган. Яшүсмер сәүдә үзәкләренең берсендә очрашырга тәкъдим иткән. Яңа танышы аннан сәүдә үзәгенең фотоларын җибәрүен сораган.

Шуннан соң егеткә мессенджер аша видеохәбәр килгән. Анда форма кигән, кулында дрон тоткан ир-ат яшүсмерне Украина махсус хезмәтләренә мәгълүмат тапшыруда һәм террорчыларга ярдәм итүдә гаепләгән.

Янаулы шалтыратулар дәвам иткән. Үзен полиция һәм прокуратура хезмәткәрләре дип таныштырган кешеләр егетне онлайн-тентү үткәрергә кирәк дип ышандырган. Алар өйдәге барлык акчаны җыярга кушкан.

Коткыга бирелгән яшүсмер миллион сум акча җыйган һәм аны курьерга тапшырган.

Рәдис Юсупов мондый очракларда мошенниклар куллана торган «онлайн-тентү» һәм «акчаларны декларацияләү» кебек терминнарның чынлыкта юклыгын искәрткән.

Полиция кисәтә: таныш булмаган кешеләр телефон яки интернет аша янаса, куркытса һәм акча тапшыруны таләп итсә, аларга ышанмагыз. Бу хакта кичекмәстән хокук саклау органнарына хәбәр итәргә кирәк.