Эчәклек рагыннан сакланырга ярдәм итүче продуктлар билгеле

Бу хакта PLOS Medicine журналында басылган яңа тикшеренүдә әйтелә. АКШның Милли яман шеш институты галимнәре 50 яшьтән 71 яшькә кадәрге 461 меңнән артык кешенең сәламәтлеге турында мәгълүматларны өйрәнгән. Катнашучыларны уртача 19 ел күзәткәннәр. Шушы вакыт эчендә эчәклек рагының 10 меңнән артык очрагы теркәлгән.

Тикшеренү нәтиҗәләре күрсәткәнчә, икмәкне күбрәк ашаган кешеләрдә авыру куркынычы 9 процентка түбәнрәк булган. Коры иртәнге ашларны еш кулланучыларда бу күрсәткеч 16 процент тәшкил иткән. Сөт эчемлекләре һәм туңдырылган десертлар куллану да куркынычның 18 процентка түбәнрәк булуы белән бәйле икән.

Клетчаткага бай ризыкларның да файдасы булырга мөмкин.

Тикшеренүдә клетчатканы көненә 10 граммга күбрәк куллану эчәклек рагы куркынычының 28 процентка түбәнрәк булуы белән бәйле дип күрсәтелә. Ә менә эшкәртелгән ит һәм балык продуктларын куллану авыру куркынычының 10 процентка артуы белән бәйле булган.

Галимнәр бу нәтиҗәләрнең аерым продуктларның яман шештән саклавын исбатламавын искәртә. Шулай да тулы бөртекле ризыкларга һәм клетчаткага бай продуктларга өстенлек бирү сәламәт туклануның мөһим өлеше булып кала.