Имтиханнарга әзерлек: ата-аналар репетиторларга өметләнә

Бу хакта "Роскачество"ның Кулланучылар тәртибен өйрәнү үзәге үткәргән сораштыру нәтиҗәләре сөйли.

Мәктәп белеме генә җитми

Тикшеренүдә катнашучыларның 68 проценты балалары өчен репетитор ялларга җыенуын белдергән. Тагын 11 процент ата-ана белем бирү платформаларына яки онлайн-мәктәпләргә өметләнә. Сораштыруда катнашучыларның 6 проценты өстәмә әзерлекне мәктәп дәресләре белән генә чикләргә, тагын 6 проценты белем бирү оешмасындагы өстәмә дәресләргә йөрергә планлаштыра. Ә 5 процент укучыны интернет һәм уку әсбаплары ярдәмендә мөстәкыйль әзерләүне сайлаган. 4 процент ата-ана әлегә әзерлек форматы турында төгәл карарга килмәгән.

• Имтиханнар санына килгәндә, сораштырылганнарның 45 проценты балалары дүрт фән тапшырырга җыенуын әйткән. 38 процент өч дисциплина буенча имтихан бирергә әзерләнә. 14 процент ике мәҗбүри имтихан белән генә чикләнергә планлаштыра, ә 3 процент биш фән тапшырырга җыена. Ата-аналарның 56 проценты мәктәптә алган белемнең генә имтиханнарга әзерләнү өчен җитәрлек булмаячагын әйтә.

Кесә түзсен

Репетиторларга түләү өчен дә шактый чыгымнар каралган. Сораштыруда катнашучыларның 23 проценты ай саен 10-20 мең сум тотарга әзер. 17 процент ата-ана 5 мең сумга кадәр, шул ук күләмдәге респондентлар 5-10 мең сум һәм 20-30 мең сум күләмендә акча бүлеп бирергә планлаштыра. Тагын 14 процент айлык чыгымнарның 30-50 мең сумга җитүен күздә тота. Ә 12 процент ата-ана репетиторларга аена 50 мең сумнан да күбрәк түләргә әзер.

Олимпиадаларга караш та төрлечә. Сораштырылганнарның 36 проценты балаларының олимпиадаларда катнашмавын, игътибарны имтиханнарга әзерлеккә юнәлтүен әйткән. 29 процент ата-ана олимпиадаларны тәҗрибә туплау һәм портфолио өчен файдалы дип саный. 14 процент аларда катнашуны югары уку йортына кергәндә бирелә торган ташламалар белән бәйли. Шул ук вакытта 13 процент респондент олимпиадаларны файдасыз дип саный.