Казанда мотоциклчы һәлак булган юл-транспорт һәлакәте буенча машина йөртүче хөкем ителәчәк

Фаҗига 5 майда Краснококшайская урамында булган. Тикшерү версиясе буенча, Lada Largus автомобиле йөртүчесе борылыш ясаганда мотоциклга юл бирмәгән. Нәтиҗәдә транспорт чаралары бәрелешкән. Мотоцикл йөртүчесе алган җәрәхәтләрдән һәлакәт урынында үлгән. 

Татарстан прокуратурасы хәбәр иткәнчә, машина йөртүчегә саксызлык аркасында кеше үлеменә китергән юл хәрәкәте кагыйдәләрен бозу турында гаепләү белдерелгән.

Җинаять эше судка җибәрелгән. Хәзер машина йөртүченең гаебенә һәм җәзасына суд бәя бирәчәк.