Көз, мәктәп һәм салкын тиюләр: баланы авырулардан саклау өчен 5 төп кагыйдә

Моңа һава температурасының үзгәрүе, көн режимының алышынуы һәм балаларның яңадан зур коллективларга җыелуы сәбәп була.

Белгечләр сүзләренчә, уку елы башында бала организмына һәм иммун системасына яңа шартларга җайлашу өчен вакыт кирәк. Ата-аналарга баланың көндәлек режимына һәм сәламәтлегенә аеруча игътибарлы булырга киңәш ителә.

Ни өчен көзен балалар ешрак авырый?

1. Организмның сезонга җайлашуы

Көз — организмның җәйге режимнан салкынрак чорга күчү вакыты. Бу чорда иммун системасына да яңа шартларга җайлашырга туры килә. Баланың иммунитеты әле формалашу этабында була һәм бу процесс яшүсмерлек чорына кадәр дәвам итә.

2. Һава температурасының үзгәрүе

Көзен көннәр салкынлана, температура еш үзгәреп тора. Суыту чорында респиратор инфекцияләр белән авыручылар саны да артырга мөмкин.

3. Көн режимының алышынуы

Каникул вакытындагы ирекле режимнан соң бала яңадан иртә торырга, дәресләргә йөрергә һәм билгеле бер көн тәртибенә күчәргә тиеш. Организмга бу үзгәрешкә җайлашу өчен вакыт кирәк.

4. Акыл һәм эмоциональ йөкләнешнең артуы

Уку елы башлану белән балаларның физик кына түгел, ә акыл һәм эмоциональ йөкләнеше дә арта. Дәресләр, өй эшләре, түгәрәкләр һәм башка шөгыльләр ял итүгә вакытны киметергә мөмкин.

5. Инфекцияләрнең коллективта таралуы

Каникулдан соң балалар бакчаларга, мәктәпләргә һәм спорт секцияләренә яңадан җыела. Күп кеше белән тыгыз аралашу вакытында вирусларның таралу куркынычы арта. Инфекция кузгаткычлары уртак уенчыклар, уку-спорт кирәк-яраклары, ишек тоткалары һәм башка предметлар аша да күчәргә мөмкин.

Баланың сәламәтлеген ничек сакларга?

Белгечләр ата-аналарга баланың йокы һәм ял режимын сакларга, һава торышына туры китереп киендерергә, дөрес туклануга игътибар итәргә һәм шәхси гигиена кагыйдәләрен үтәргә киңәш итә.

Шулай ук авыру билгеләре булган баланы мәктәпкә яки балалар бакчасына җибәрмәү мөһим. Бу аның үзенә дә тизрәк терелергә ярдәм итәчәк, ә коллективта инфекция таралу куркынычын киметәчәк.