Мәктәпләрдә дежур тору кире кайта. Россия Иҗтимагый палатасы яңа тәкъдим белән чыккан

Сүз класс буенча дежур тору, кабинетларны җыештыру, мәктәп яны территориясен карау кебек эшләр турында бара. Иң мөһиме — бу эшләрне әти-әниләр белән килештермичә дә кире кайтару мөмкинлеге карала.

Әлеге инициативаны Россия Иҗтимагый палатасы әгъзасы тәкъдим иткән. Аның фикеренчә, бу система совет педагогы Антон Макаренко тәгълиматларына нигезләнә һәм балаларны хезмәткә, җаваплылыкка өйрәтүнең нәтиҗәле ысулы булып тора.

Тәкъдим авторы билгеләп үткәнчә, мондый тәҗрибә — вакыт белән сыналган тәрбия чарасы, һәм аны кире кайтару мәктәпләрдә дисциплинаны һәм мөстәкыйльлекне ныгытырга мөмкин.

Шул ук вакытта җәмгыятьтә фикерләр икегә бүленә: кайберәүләр моны кирәкле тәрбия дип санаса, башкалар укучыларның болай да күп йөкләнешле булуын искәртә.

Ә сез ничек уйлыйсыз?
Балаларны хезмәткә өйрәтү мөһимме?
Әллә бу аларның уку вакытына зыян китерәме?