Мәүлид ае уңаеннан Арчадан МХОның алгы сызыгына «Нива» җибәрделәр

Машинаның ачкычларын тапшыру тантанасы 27 августта Арчаның Үзәк мәчетендә узган. Чарада район башлыгы Алмаз Хисаметдинов, Арча районы имам-мөхтәсибе Әмир хәзрәт Миңнемуллин, район имамнары, мөхтәсибәт хезмәткәрләре, волонтерлар һәм мәхәллә халкы катнашкан.

Юлсыз урыннарда да йөрергә яраклы автомобиль хәрбиләргә азык-төлек һәм дарулар ташуда, шулай ук башка хезмәт бурычларын үтәүдә ярдәм итәчәк. Машина якын көннәрдә алгы сызыкка озатылачак.

Чара барышында 31832нче «Тимер» хәрби часте командиры исеменнән актив имамнарга һәм эшмәкәрләргә МХОга ярдәм күрсәткәннәре өчен медальләр һәм рәхмәт хатлары да тапшырылган.

Арча мөхтәсибәте мәчетләрендә хәрбиләргә ярдәм йөзеннән маскировка челтәрләре үрү һәм гуманитар ярдәм җыю даими оештырыла.