Питрауда кавышалар, Покрауда туй уйнаталар: республикакүләм Питрау турында

Урын – үзгәрешсез: Мамадыш районы Җөри авылы янында Тырлау аланы. Мамадыш районы башкарма комитеты җитәкчесе Артур Ефимов сүзләренчә, бәйрәм быел да 50 меңгә якын кунакны җыячак.

“Питрау үтте, җәй бетте”, ؘ– ди керәшеннәр. Питрау – җәйнең уртасын символлаштыручы календарь бәйрәм. Аның үзенең йолалары, гореф-гадәтләр бар.

– Троица бәйрәмен без Сабан туйны кебек кыр эшләрен тәмамлангач үткәрәбез. Питраудан соң исә, җәй тәмамлану фазасына күчә. Керәшеннәр печәнгә төшә, себерке әзерли.  Питрауга кадәр чабылган печәнне “сыек” дип атыйлар. Питрауга кадәр ясалган себерке тарала, сына, коела, лайлалана. Питраудан соң күке кычкырмый. Шуңа күрә вакытлы-вакытсыз сүз  сөйләп йөрүчеләрне “Питрау күкесе” дип атыйлар. Питраудан соң су да коенмыйлар. Бүген дә керәшеннәр шушы йола, гореф-гадәт, кагыйдәләрне истә тотып яши. Моңа өстәп, Питрауда кавышалар, Покрауда туй уйнаталар дип тә әйтәләр. Шуңа Питрау – танышу, кавышу урыны да, – ди  Керәшеннәрнең иҗтимагый үзәге рәисе, Яков Емельянов исемендәге мәдәни үзәк җитәкчесе Людмила Белоусова.