Путин Россиядә яңа мобилизация турындагы хәбәрләрне «сафсата» дип атады

Ул мондый мәгълүматны мәгълүмати һөҗүм дип бәяләде. Бишкекта узган Шанхай хезмәттәшлек оешмасы (ШОС) саммиты тәмамланганнан соң журналистлар белән әңгәмә вакытында Путиннан Россиядә яңа мобилизация үткәрү ихтималы турында сорадылар.

Президент бу хәбәрләрне «сафсата» дип атады һәм аларны Россиядәге вәзгыятьне тотрыксызлаштыруга юнәлдерелгән мәгълүмати һөҗүм дип бәяләде.

Яңа мобилизация турындагы фаразлар җәй дәвамында берничә тапкыр яңгырады. Аерым алганда, Украина Президенты Владимир Зеленский Россия хакимияте Дәүләт Думасына сайлаулардан соң мобилизация башларга мөмкин дип белдергән иде. Кайбер чит ил басмалары да мондый сценарий турында язды, әмма аларның чыганаклары карарның кабул ителмәвен искәрткән.

Россия хакимияте вәкилләре моңа кадәр дә яңа мобилизация турындагы хәбәрләрне кире какты. Куркынычсызлык Советы Рәисе урынбасары Дмитрий Медведев хәрби бурычларны үтәү өчен контракт буенча хезмәт итүчеләрнең җитәрлек булуын белдерде.

Дәүләт Думасына депутатлар сайлауларында тавыш бирү 18–20 сентябрьдә узачак.