Россиядә былтыр йөзләгән торак пункт юкка чыккан. Татарстанда андыйлар ничә?

Россиядә узган елда 266 торак пункт юкка чыккан, тагын 41е үзара берләштерелгән. Бу хакта танылган географ Станислав Адамайтис хәбәр итә.

Иң күп авыллар Кострома өлкәсендә юк булган. Аларның саны - 144. Икенче урында Новгород өлкәсе тора, анда 57 торак пункт бетерелгән. Өчлекне Пермь крае йомгаклый — биредә 15 торак пункт юкка чыккан.

2024 елда юкка чыккан торак пунктлар саны 300дән артып киткән иде.

Татарстанга килгәндә, узган елда республикада ике торак пункт бетерелде. Сүз Хазовка бистәсе һәм Бота урманчылыгы турында бара, аларның үсеш перспективалары юк дип табылды. Бота урманчылыгында яшәүчеләр Молодежный бистәсенә 1997 елда ук күченгәннәр. Хазовка 1985 елда бушап кала: бистә халкы Сосновка һәм Нолинка авылларына күченә.