Россиядә кибетләр ябыла: сәүдәне маркетплейслар алыштыра алырмы?

Мәскәүдә кибетләр саны 87 меңнән 82,5 меңгә кадәр, ә Санкт-Петербургта 44 меңнән 42,2 меңгә кадәр кимегән. Бу тенденция азык-төлек кибетләренә дә, кием, канцелярия, электроника һәм башка товарлар сатучы нокталарга да кагыла.

Иң зур кимү түбәндәге өлкәләрдә күзәтелә:

• кием кибетләре – 12 процент;

• канцелярия товарлары – Россия буенча уртача 5 процентка, миллионлы шәһәрләрдә 12,3 процентка (630дан артык кибет ябылган);

• зоотоварлар – 12 процент;

• электроника – 8 процент;

• спорт товарлары – 6 процент.

Шул ук вакытта белгечләр офлайн-сәүдәнең кризисы турында сөйләргә иртә, дип саный. Хәзерге вакытта интернет аша илдәге ваклап сатуның 22,3 проценты гына башкарыла, ягъни күпчелек сатып алулар әле дә гадәти кибетләрдә ясала.

Шулай да маркетплейсларның йогынтысы арта. Бүген Россиядә интернеттан заказ бирелгән товарларны алу өчен якынча 300 мең бирү пункты (ПВЗ) эшли.

Эксперт Артем Соколов фикеренчә, киләчәктә офлайн-кибетләр юкка чыкмаячак, әмма аларның вазифасы үзгәрәчәк. Алар товар сату урыны гына түгел, ә сатып алучы белән аралашу, сервис күрсәтү һәм яңа тәэсирләр тудыру мәйданына әвереләчәк.