Россиядә приюттан хайван алу өчен яңа дәүләт сервисы барлыкка киләчәк

Яңа платформа аша приюттагы хайваннар турында мәгълүмат белән танышып, аларның берсен үзеңә алу мөмкинлеге булачак. Шулай ук сервис ярдәмендә югалган йорт хайваннарын эзләү һәм ветеринария белгечләрен теркәү планлаштырыла.

Проектларны гамәлгә ашыру өчен 80 миллион сум акча бүлеп бирү каралган. Яңа цифрлы сервисларны ноябрь уртасыннан эшләтеп җибәрү көтелә.

Хәзерге вакытта «Дәүләт хезмәтләре» порталында да йорт хайваннары белән бәйле берничә мөмкинлек бар. Әйтик, хайванны дәүләт ветеринария клиникасына онлайн кабул итүгә яздырырга, хуҗасыз хайван табылуы турында хәбәр итәргә һәм йорт хайваннарын карау кагыйдәләре белән танышырга мөмкин. Яңа сервис эшли башласа, приюттагы хайваннарга яңа гаилә табу тагын да җиңеләергә мөмкин.