Татарстан Дәүләт Советы язгы сессияне йомгаклый: 16 мөһим мәсьәлә каралачак

Ул язгы сессиянең соңгы пленар утырышы булачак. Парламент депутатлары 16 мәсьәлә буенча фикер алышырга җыена. Алар арасында 10 республика законы проекты һәм бер федераль закон проекты бар.

Дәүләт Советы Президиумы утырышында парламент Рәисе вазыйфаларын башкаручы Марат Әхмәтов алдагы айларда республика өчен мөһим сәяси һәм иҗтимагый вакыйгаларга игътибар юнәлтте. Аның сүзләренчә, августта Казан «РОСТКИ: Россия һәм Кытай – үзара файдалы хезмәттәшлек» халыкара форумын кабул итәчәк, Яр Чаллыда республика педагогларының традицион август киңәшмәсе узачак. Ә инде 20 сентябрьдә Россия Дәүләт Думасына депутатлар сайлау һәм Биектау округында Дәүләт Советы депутатын өстәмә сайлау кампаниясе старт алачак.

Язгы сессиянең соңгы утырышының көн тәртибе дә шактый күләмле. Депутатлар республика Бюджет кодексына, җирле үзидарәгә, кече һәм урта эшмәкәрлеккә, милеккә салымга, төзелеш һәм торак кооперативлары эшчәнлегенә кагылышлы законнарга үзгәрешләр кертергә ниятли.

Моннан тыш, административ хокук бозулар турында республика кодексына, санитар-эпидемиологик иминлек һәм адреслы социаль ярдәм турындагы законнарга төзәтмәләр дә беренче укылышта каралачак.

Утырышта шулай ук гадәттән тыш хәлләрдән халыкны һәм территорияләрне саклау өлкәсендәге хокукый нигезләрне камилләштерүче яңа закон проекты тәкъдим ителәчәк. Ә федераль дәрәҗәдә исә Бюджет кодексының 241 нче маддәсенә үзгәрешләр кертү тәкъдиме каралачак. Ул кайбер керемнәрне төбәк һәм муниципаль бюджетларга бүлү тәртибен ачыклый.

Депутатлар тагын бер яңа бәйрәм көне – Татарстан Республикасы Сатып алулар эшчәнлеге өлкәсе хезмәткәре көнен булдыру мәсьәләсен дә тикшерәчәк.

«Хөкүмәт сәгате» кысаларында республикада демографик сәясәтнең ничек гамәлгә ашырылуы турында хисап тыңланачак. Моннан тыш, парламентның 2026 елның беренче яртыеллыктагы эшенә нәтиҗәләр дә ясалачак.

Президиум утырышында депутатлар сәнәгатьне цифрлы трансформацияләү мәсьәләләренә дә тукталды. Ахырда дәүләт бүләкләре тапшырылды. Федераль Собрание Дәүләт Думасы Рәисенең Рәхмәтенә хезмәт ветераны Александр Гусев һәм КПРФ фракциясе җитәкчесе Хафиз Миргалимов лаек булды. Татарстан Рәисенең Рәхмәте исә күпьеллык нәтиҗәле хезмәте өчен Дәүләт Советы комиссиясе рәисе Камил Гыйльмановка белдерелде.

Татарстан Дәүләт Советы матбугат хезмәте