Татарстанда балалы гаиләләргә бер елда 15 млрд сумга якын ярдәм күрсәтелгән

Россия Социаль фондының Татарстан бүлеге хәбәр иткәнчә, дәүләт ярдәменең иң киң таралган төре — бердәм пособие. Аны республикада 90 меңнән артык гаилә ала.

Пособие гаиләнең кеременә карап билгеләнә. Аны алу өчен гаиләдә бер кешегә туры килгән уртача айлык керем Татарстанда билгеләнгән яшәү минимумыннан артмаска тиеш. Түләү күләме балага билгеләнгән яшәү минимумының 50, 75 яки 100 проценты булырга мөмкин.

Ана капиталына да ихтыяҗ зур

Ел башыннан Татарстанда 340 гаилә ана капиталы алган. Бу акчаны баланың киләчәге өчен төрле максатларга тотарга мөмкин. Әйтик, балалар бакчасы, мәктәп һәм югары уку йортында белем алу өчен түләргә, түгәрәкләргә һәм секцияләргә йөртергә, чит тел курсларына яки хәтта автомәктәптә укытуга тотарга була.

Ике һәм аннан күбрәк баласы булганнарга — яңа түләү

2026 елдан ике һәм аннан да күбрәк баласы булган гаиләләр өчен еллык гаилә түләве кертелде. Ул җан башына уртача кереме төбәктәге яшәү минимумының 1,5 тапкырыннан артмаган гаиләләргә бирелә. Түләү күләме гаиләнең узган елда түләгән керем салымына карап исәпләнә.

Еллык гаилә түләвен алу өчен гаризаны 1 октябрьгә кадәр бирергә кирәк.

Россия Социаль фондының Татарстан бүлеге идарәчесе Эдуард Вафин билгеләп үткәнчә, балалы гаиләләргә ярдәм итү — төп юнәлешләрнең берсе. Аның сүзләренчә, ата-аналар үзләренә тиешле ярдәм чаралары турында белергә һәм алардан вакытында файдаланырга тиеш.