Татарстанда бердәм пособие: 184 меңнән артык балага 14 млрд сум түләнгән

Социаль фонд мәгълүматларына караганда, республикада бердәм пособие алучы балалар саны һәр бишенче балага туры килә. Хәзерге вакытта түләүне 90 мең гаилә ала.

2026 елда бердәм пособие кемгә бирелә?

Бердәм пособие балалары булган мохтаҗ гаиләләргә билгеләнә. Аны алу өчен гаиләнең җан башына уртача айлык кереме төбәктәге җан башына яшәү минимумыннан артмаска тиеш. Моннан тыш, 2026 елдан хезмәткә сәләтле гаилә әгъзасының исәп-хисап чорындагы кереме кимендә 8 МРОТ булырга тиеш. 

Бердәм пособие күләме күпме?

Түләү күләме гаиләнең кеременә карап билгеләнә һәм балага төбәктә билгеләнгән яшәү минимумының 50, 75 яки 100 проценты булырга мөмкин.

2026 елда Татарстанда балага яшәү минимумы 15 615 сум тәшкил итә. Димәк, бердәм пособие күләме гаиләнең кеременә карап 7807,50 сумнан 15 615 сумга кадәр булырга мөмкин.

«Нульле керем» кагыйдәсе ничек эшли?

Кайбер очракларда гаилә әгъзасының хезмәт эшчәнлегеннән кереме булмау пособие билгеләүгә киртә түгел. Мәсәлән, картлык буенча, туендыручысын югалту яки инвалидлык буенча пенсия алу керем булмауның нигезле сәбәбе дип таныла.

Шулай ук исәп-хисап чорындагы 10 ай дәвамында керем булмауның нигезле сәбәпләре булган очракта, «нульле керем» белән бердәм пособие билгеләү мөмкинлеге саклана. 

2026 елда пособие билгеләү тәртибендә нинди яңалыклар бар?

Быел бердәм пособие исәпләгәндә гаилә керемен билгеләү тәртибенә берничә үзгәреш кертелде. Аерым алганда, минималь керем таләбе 8 МРОТка кадәр арттырылды, керемнәр составын исәпләүгә бәйле кайбер кагыйдәләр төгәлләштерелде.

Шул исәптән, эш бирүче тарафыннан бала туу яки уллыкка алу уңаеннан бирелә торган бер тапкырлык матди ярдәм һәм кайбер башка түләүләр гаиләнең җан башына уртача керемен исәпләгәндә исәпкә алынмый. 

Татарстан Социаль фонды идарәчесе Эдуард Вафин билгеләп үткәнчә, 2026 елда кертелгән үзгәрешләр инде гамәлдә, ә гаиләләр индексацияләнгән күләмдәге түләүләрне вакытында ала.