Татарстанда ел башыннан 1,5 меңнән артык баланы талпан тешләгән

Талпан тешләгән кешеләр арасында 1558 бала бар. Бу хакта Роспотребнадзорның Татарстан буенча идарәсендә хәбәр иттеләр. Талпан тешләү очраклары иң күп Казанда теркәлгән — шәһәрдә 2854 кеше табибларга мөрәҗәгать иткән. Икенче урында Чаллы — 592 очрак. Өченче урынны Әлмәт районы били — анда 381 кешене талпан тешләгән. Топ-5кә шулай ук Түбән Кама районы (361 очрак) һәм Яшел Үзән районы (324 очрак) кергән.

Талпан тешләүләрнең күбесе табигатьтә булган

Белгечләр мәгълүматына караганда, талпаннарның 85 проценттан артыгы кешеләрне табигый биотопларда, шулай ук йорт яны һәм дача кишәрлекләрендә чаккан. 256 очракта талпан тешләве Татарстаннан читтә булган.

Республикада талпаннар аша күчә торган авырулар да ачыкланган. Аерым алганда, боррелиозның 23 очрагы һәм читтән кертелгән талпан энцефалитының өч очрагы теркәлгән.

Ял итү урыннары талпаннардан эшкәртелә

Татарстанда парклар, скверлар һәм массакүләм ял итү урыннарын талпаннардан эшкәртү дәвам итә. Барлыгы 3101,4 гектар мәйдан эшкәртелгән.

Талпан энцефалитына каршы иммунизация 14 474 кешене колачлаган. Бу планның 113 процентын тәшкил итә.

Белгечләр табигатьтә ял иткәндә талпаннардан саклану чараларын үтәргә һәм тәндә талпан табылган очракта медицина учреждениесенә мөрәҗәгать итәргә киңәш итә.