Татарстанда ел башыннан 26 яшүсмер наркоҗинаятьләрдә тоткарланган

ТР буенча Эчке эшләр министрлыгының матбугат конференциясендә Наркотиклар әйләнешен контрольдә тоту идарәсе башлыгы вазифаларын вакытлыча башкаручы, полиция полковнигы Павел Фоминых шулай дип сөйләде.

Аның сүзләренчә, заманча интернет-ресурслар наркобизнес оештыручыларга яшүсмерләрне аноним рәвештә вербовкаларга мөмкинлек бирә. Наркотиклар сатучы интернет-кибетләрнең оештыручылары кайвакыт балигъ булмаганнарга җаваплылыктан качу юлларын да «өйрәтәләр».

Ләкин полиция хезмәткәре искәрткәнчә, мондый киңәшләр яшүсмерләрне җаваплылыктан коткармый. Наркотиклар сату аеруча авыр җинаятьләр категориясенә керә һәм судлар еш кына реаль төрмә җәзасы билгели.

Ел башыннан Татарстанда наркотиклар белән бәйле җинаятьләргә җәлеп ителгән 26 бала тоткарланган. Аларның дүртесе генә җинаять җаваплылыгы яшенә җитмәгән.