Татарстанда илкүләм проект ярдәмендә өлкәннәр һәм инвалидлар өчен интернат-йорт төзелә

«Бу гомуми мәйданы 8620 квадрат метр тәшкил иткән ике катлы бина булачак. Интернат-йорт 120 урынга исәпләнгән», – дип сөйләде ТР хезмәт, халыкны эш белән тәэмин итү һәм социаль яклау министры урынбасары Адель Мөбәрәкшин.

Аның сүзләренчә, хәзерге вакытта объектның әзерлеге 67 процент тәшкил итә. Бинаның тышкы ягы, түбәсе ясалган инде. Инженерлык челтәрләре монтажлана, электр энергиясе, су белән тәэмин ителеш, канализация, ягып җылыту системалары җайга салына, бүлмә эчләре эшләнә. Якын вакытта тирә-як территориясен төзекләндерүгә тотыначаклар.

«Гаилә» илкүләм проекты кысаларында яңа җиһазлар кайтарылачак. Учреждениедә ут, электр җиһазлары, тәрәзәдәге жалюзилар белән тавыш ярдәмендә идарә итү җайланмалары урнаштырылган «акыллы» палаталар да булыр дип көтелә. Анда физик мөмкинлеге чикле кешеләргә уңайлылыклар тудырылачак.

«Нәтиҗәдә, безнең бүгенге көндә өлкәннәр һәм инвалидлар өчен 26 интернат-йортта кысан шартларда яши торган өлкән яшьтәге 60 кеше уңайлы бинага күченәчәк. Шулай ук телгә алынган учреждениеләргә фаразланган 100 кешелек чират та юкка чыгачак. Моннан тыш, өстәмә рәвештә 91 эш урыны булдырылачак», – диде Адель Мөбәрәкшин.

Билгеле булганча, Татарстанда илкүләм проектларны гамәлгә ашыруны республика Рәисе Рөстәм Миңнеханов нык контрольдә тота.

Чыганак: Татар-информ