Татарстанда ипотекага кечкенә фатирларны ешрак ала башлаганнар

«Домклик» аналитиклары мәгълүматларына караганда, бер ел эчендә 28 квадрат метрга кадәрге фатирларның ипотека килешүләрендәге өлеше 8,6 проценттан 10,4 процентка җиткән. Шулай итеп, республикада ипотека белән төзелгән якынча һәр унынчы килешү кече мәйданлы фатирга туры килә.

Шул ук вакытта Татарстанда мондый торак тәкъдиме чагыштырмача аз. Август аенда 28 квадрат метрга кадәрге студияләр һәм фатирлар беренчел базардагы барлык тәкъдимнәрнең нибары 3 процентын тәшкил иткән.

Чагыштыру өчен, Санкт-Петербургта бу күрсәткеч 22,1 процент, Ленинград өлкәсендә – 16,8 процент, Краснодар краенда – 13,8 процент булган.

Татарстанда кече габаритлы торакның базардагы өлеше 3 процент кына булса да, ипотека аша сатып алуларда ул инде 10 проценттан артып киткән. Бу республикада компакт фатирларга ихтыяҗның тәкъдимгә караганда тизрәк үсүен күрсәтә.