Татарстаннан Иранга 50 тоннадан артык гуманитар ярдәм юлланды

“Нәфис” хәйрия фонды Татарстан мөселманнары Диния нәзарәте һәм Иран Ислам Республикасы Баш консуллыгы белән берлектә 51 тоннадан артык гуманитар ярдәм җибәрде. Йөк өч фурага төялгән һәм ул якын арада зыян күргән төбәкләргә барып җитәчәк.

Әлеге ярдәм Иранда соңгы атналарда барган хәрби һөҗүмнәр нәтиҗәсендә авыр хәлдә калган халыкка адресланган. РФ Дәүләт Думасы депутаты, “Нәфис” фонды Советы рәисе Ирек Богуславский билгеләп үткәнчә, бу – фаҗига кичергән кешеләргә теләктәшлек күрсәтү һәм ярдәм итү максатыннан оештырылган акция.

Гуманитар йөк составында көндәлек кулланылышта кирәкле товарлар бар. Алар арасында:

• 43 меңнән артык шешә көнбагыш мае,

• 4 мең данә кер юу порошогы,

• 10 меңләп сабын һәм савыт-саба юу чаралары,

• шампуньлар һәм башка чистарту чаралары.

Йөкне рәсмиләштерүдә Татарстан мөселманнары Диния нәзарәтенең “Зәкят” хәйрия фонды ярдәм иткән.