Татарстаннан Төркиягә ял итәргә киткән турист ханымны катер бәрдереп үтергән

Ул йөзәргә рөхсәт ителгән урынны узып алгарак кергән. Шул вакытта туристлар утырган катерның капитаны суда йөзгән хатынны күрмичә, зур тизлектә аның өстенә килеп кергән. Бу һәлакәтнең шаһитләре шунда ук коткаручыларны һәм ашыгыч ярдәмне чакырткан, ләкин Линарияне коткарып кала алмаганнар,  табиблар аның үлемен раслаган. Шкипер һәм компания хуҗасы тоткарланган. Ә шәһәр хакимияте, тикшерү тәмамланганчы, бу районда көймәләр, катерлар узуны тыйган.

Булган хәлнең төп версиясе буенча, Линария рөхсәт ителгән урыннан йөзеп чыккан һәм парасейлинг катеры үтүче юлга чыккан. 
Линариянең үлеме турында Татарстандагы туганнары икенче көнне белгәннәр, аларга Россия консуллыгыннан шалтыратканар. Мәрхүмәнең энесе Ришат И.сөйләгәнчә, гаилә мәетне туган илгә алып кайту өчен документлар рәсмиләштерү белән шөгыльләнә. Бу катлаулы процессны иминият компаниясе үз өстенә алган.

Линарияның икътисадчы һәм юристлык дипломы бар, аннары берничә ел Башкортстанның энергетика предприятиесендә баш хисапчы булып эшләгән. Соңрак үз шәхси предприятиесен ача һәм бухгалтерлык һәм салым хезмәтләре күрсәткән.

Соңгы елларда Линария 20 яшьлек кызы Азалия белән Казанда яшәгән. Анда алар бергәләп груминг белән шөгыльләнгәннәр - йорт хайваннарын карау, аларны тәрбияләү белән шөгыльләнгәннәр. Хатын эт-мәчеләр өчен үлеп киткән. Хәтта волонтер буларак йортсыз этләргә һәм мәчеләргә хуҗалар эзләгән.

Һәлакәткә юлыккан мәрхүмәне җирләүнең кайда булачагы әлегә билгеле түгел. Чөнки Линариянең гәүдәсен туган иленә алып кайтуга бәйле булачак. Төрек тикшерүе бу фаҗиганең барлык шартларын ачыклауны дәвам итә.

Фото: социаль челтәрләрдән