“Татмедиа”да яшьләрне вербовкалау турында сөйләделәр

Очрашуның төп спикеры — Андрей Медведев. Ул «Предательство» фильмы өстендә эшләү тәҗрибәсе белән уртаклашты һәм яшьләрнең куркыныч юлга ничек кереп китүен аңлатты.

Аның сүзләренчә, иң гаҗәпләндергәне — кайбер яшүсмерләрнең бөтенләй китап укымавы:

“Мин аралашкан егетләрнең берсе дә бер генә китап та укымаган. Үз-үзләрен үстерергә дә омтылыш юк. Бу — ата-аналар җаваплылыгы,” — диде ул.

Медведев билгеләп үткәнчә, вербовщиклар еш кына яшьләрнең тәҗрибәсезлегеннән файдалана: алар куркынычны аңлап бетерми; җинаять өчен нинди җәза булуын күз алдына китерми; нәтиҗәләр турында уйламый. 

Семинарда журналистлар, шулай ук министрлыклар һәм ведомстволарның матбугат хезмәтләре вәкилләре катнашты. Алар спикерга сораулар биреп, медиа аша профилактика эшен ничек көчәйтергә мөмкин булуын тикшерде.