Түләүле трассадагы фаҗига: хатын-кыз йөртүче суд каршына басачак

Казанда яшәүче 44 яшьлек хатын-кыз юл һәлакәтендә гаепләнә.

Тикшерү мәгълүматлары буенча, фаҗига 2025 елның 15 декабрендә М-12 трассасының 891 нче чакрымында булган. Хатын-кыз Киа Рио автомобиле белән идарә иткәндә, карлы һава шартларында һәм караңгы вакытта ике йөк машинасын узып китәргә булган.

Узып барганда автомобильнең идарәсе югалган, нәтиҗәдә җиңел машина каршы якка чыгып, Шагман йөк автомобиле белән бәрелешкән. Һәлакәттә Киа Рио салонындагы 47 яшьлек пассажир авыр җәрәхәтләр алган.

Тикшерү версиясе буенча, юл хәрәкәте кагыйдәләрен бозу аркасында кеше сәламәтлегенә авыр зыян килгән. Хатын-кызга карата кузгатылган җинаять эше хәзер Теләче район судында карала.

Юл белгечләре искәртүенчә, кышкы чорда, аеруча кар яву вакытында, тизлекне дөрес сайлау һәм куркыныч маневрлардан баш тарту юлдагы иминлек өчен аеруча мөһим.