Генийлар диплом эшен дә шигъри юллар белән яза

Олимпиадада җиңү бер-­ике көн эчендә генә ирешә торган әйбер түгел. Мәктәп укучылары арасында халыкара Менделеев олимпиадасында алтын медаль яулаган Булат Курамшин белән Әмир Гыйззәтуллин бу җиңүләренә дүрт ел әзерләнгән.
- Химия - барлык фәннәрне берләштерүче фән. Анда математика да, биология дә, физика да бар. Ул бик күп сорауларга җавап бирә. Төгәл фәннәрне яратсам да, гуманитариядән «аксыйм» бераз, - ди Әмир.
Булатның химиягә мәхәббәте «өчле» билгесеннән башланган. Укытучы аның көндәлегенә беренче тапкыр начар билге куйгач кына әлеге фәнне ныклап өйрәнә башлый ул, хәзер дөньяда химия­не иң яхшы белүче укучыларның берсе.
Игорь Никоноров та, әле IX сыйныфта гына укуына карамастан, инде астрономия һәм космос физикасы буенча халыкара олимпиадада икенче урын алган егет.
- Җир шарыннан ерак булган әйберләрне өйрәнү кызык миңа. Минемчә, тырышкан һәр кеше олимпиадада катнашып, җиңү яулый ала. Гений булып тумыйлар, гений булып җитлегәләр, - ди Игорь.
Ә үзен гений дигәнне яратмый егет, шунда ук кызарып чыга.

Ни кызык, акыллыбашлар арасында кызлар әзрәк булып чык­ты. Ләкин ниндиләре генә әле! Зәринә Бикмуллина, мәсәлән, берьюлы өч олимпиадада җиңүче. Экология буенча россиякүләм олимпиадада - беренче, рус теле һәм рус әдәбияты буенча икенче урынны яулаган. Быел ул рес­публика «Ел укучысы» исеменә ия булды.

Татарстан инде өченче ел рәттән олимпиада нәтиҗәләре буенча өченче урында бара. Без Мәскәү һәм Санкт-Петербург шәһәрләреннән генә калышабыз. Быел республика данын 23 муниципаль үзәктән 251 бала яклады. Безнекеләр олимпиададан 141 призлы урын алып кайтты. Бу, узган ел белән чагыштыр­ганда, 32 җиңүгә күбрәк.

- Олимпиада буенча уңай динамика күзәтелә. Максатыбыз - киләсе елга Россиянең төньяк башкаласы Санкт-Петербургны узып китү. Олимпиада массакүләм спорт кебек: анда җиңү өчен һәр укучының төпле белем алуы мөһим. Быел мине математика фәне бик нык сөендерде. Узган ел аның буенча җиде кеше генә җиңү яуласа, быел 13 кеше беренчелекне алды, - диде Татарстан мәгариф һәм фән министры Энгель Фәттахов.
Кичке якта акыллыбашлар Кремльдә Татарстан Президенты Рөстәм Миңнеханов белән очрашты.