Шик тудырсаң, сумкаңны тикшерәләр

Укытучы, балада куркыныч әйберләр бар дип уйласа, тикшерү уздыра ала. «Тикшерү бала психикасына зыян салмаслык итеп үткәрелергә тиеш», - дип хәбәр итә Финляндиянең «YLE» радиосы.
ТР Мәгариф һәм фән министрлыгы гомуми белем бирү идарәсенең әйдәп баручы киңәшчесе Гөлнара Исламованың аңлатуынча, финнар гамәлгә керткән кагыйдә Россия Конституциясенә каршы килә, гражданнарның, ә бу очракта балаларның хокукларын боза. «Үзара хөрмәт, бер-береңә юл кую кебек сыйфатлар да бар бит әле. Бала шик тудыра икән, аның белән яхшылап сөйләшергә, бер дә булмаганда, тикшерү үткәрү өчен әти-әнисенең рөхсәтен алырга мөмкин бит», - ди Гөлнара Илдар кызы.